2023 წელთან შედარებით, თბილისის 2024 წლის ბიუჯეტი 130 მილიონით იზრდება. ამის შესახებ თბილისის მერმა კახა კალაძემ 13 დეკემბერს, მუნიციპალიტეტის მთავრობის სხდომაზე განაცხადა.

“2024 წლის ბიუჯეტის პროექტის მოცულობა შეადგენს 1 763 354 000 ლარს, მათ შორის არის სახელმწიფო ბიუჯეტიდან მისაღები კაპიტალური, სპეციალური ტრანსფერი – 500 000 000 ლარი. ინფრასტრუქტურის მიმართულებით დაგეგმილია 547 000 000 ლარის გამოყოფა, რაც მთლიანი ბიუჯეტის დაახლოებით 31%-ია. სოციალური/ჯანდაცვის მიმართულებით დაგეგმილია 507 632 000 ლარის გამოყოფა”, – განაცხადა კალაძემ.

კალაძე აღნიშნავს, რომ დამტკიცებულ პროექტში მოყვანილ რიცხვებთან შედარებით, ბიუჯეტი წლის განმავლობაში კიდევ გაიზრდება. სოციალური და ჯანდაცვის მიმართულებით დაგეგმილ პროექტებზე ინფორმაციას მერია მოგვიანებით გაავრცელებს.