ევროპარლამენტარი რასა იუკნევიჩიანე ამბობს, რომ „ქართული ოცნების“ ლიდერების განცხადებებზე პასუხის გაცემით დაიღალა.
მისი თქმით, „ქართული ოცნების“ არჩევანი დაძაბულობის გაღვივებაა. ამის შესახებ ევროპარლამენტარმა „მთავარ არხთან“ ისაუბრა.
„მე უკვე დავიღალე ამაზე პასუხის გაცემით, გამონათქვამებზე, რომლებიც ეკუთვნის პარლამენტის სპიკერს, „ქართული ოცნების“ თავმჯდომარეს ან პრემიერ-მინისტრს. ისინი აგრძელებენ ამაზე საუბარს, ეს მათი არჩევანია. მათი არჩევანია მანიპულაცია, დაძაბულობის გაღვივება. რასაკვირველია, ეს არ არის სიმართლე.
მე არაერთხელ მითქვამს, ბევრი ადამიანი არ არის ევროპარლამენტში, რომელიც დაინტერესებულია სამხრეთ კავკასიით და კერძოდ, საქართველოთი. ჩვენ, პარლამენტის წევრები პოლონეთიდან, ჩეხეთიდან, სლოვაკეთიდან და ბალტიისპირეთის ქვეყნებიდან, ყოველთვის ვიცავთ საქართველოს და ქართველებს. ჩვენი სახით ბევრი მეგობარი გყავთ. ძალიან ვწუხვარ სიტუაციის ასეთ გაუარესებაზე საქართველოში“, – განაცხადა რასა იუკნევიჩიანემ.[„მთავარი არხის“ სინქრონული თარგმანი].
მისი თქმით, ახლა საქართველოს ევროკავშირში გაწევრიანების გზაზე ისტორიული შანსი ეძლევა, თუმცა ეს შანსი მხოლო მაშინ იქნება გამოყენებული, თუ ქვეყანა სისტემურ რეფორმებს გაატარებს.
„ეს, რასაკვირველია, მმართველი პარტიის პასუხისმგებლობაა. მათ ახლა ყველაფერი უნდა გააკეთონ იმისთვის, რომ ეს შანსი გამოიყენონ. მაგრამ, სამწუხაროდ, საწინააღმდეგოს აკეთებენ და ძალიან ძნელია, მათ გაუწოდო მეგობრობის ხელი, რომლის გაწოდებასაც ჩვენ ვცდილობთ. იმისთვის, რომ საქართველოს მთავრობამ ჩაატაროს სათანადო რეფორმები, ევროკავშირის საბუთებში მითითებული რეფორმებია გასატარებელი“, – განაცხადა რასა იუკნევიჩიანემ.[„მთავარი არხის“ სინქრონული თარგმანი].
რაც შეეხება დეოლიგარქიზაციას, რომლის ევროკომისიის რეკომენდაციებიდან ამოღებაზე „ქართული ოცნება“ საუბრობს, რასა იუკნევიჩიანე ამბობს, ევროკავშირი თვალს ვერ დახუჭავს იმაზე, რასაც ხედავს.
