თავდაცვის სამინისტროს ყოფილი თანამშრომელი გიორგი შაიშმელაშვილი სამსახურიდან გათავისუფლებას უკავშირებს 7-8 მარტის აქციებზე მონაწილეობას.
გიორგი შაიშმელაშვილი თავდაცვის სამინისტროს რეფორმების კოორდინაციისა და მონიტორინგის დეპარტამენტის უფროსის მოადგილე იყო.
როგორც გიორგი შაიშმელაშვილი აცხადებს, მას სამსახურიდან გათავისუფლების ოფიციალურ მიზეზად რეორგანიზაცია დაუსახელეს.
„რამდენიმე დღის წინ თავდაცვის მინისტრმა, აი, იმან, ლიბერალიზმს რომ მიიჩნევს ქვეყნის სუვერენიტეტისთვის საფრთხედ და ჯარიც ალბათ ლიბერალებთან ბრძოლის იარაღი ჰგონია, სამსახურიდან გამათავისუფლა. რამდენადაც ვხვდები, რუსულ კანონზე მკვეთრი პოზიცია და 7-8 მარტის აქციებზე მონაწილეობა არ მეპატია. ცხადია, ეს პირდაპირ არავის უთქვამს, მაგრამ გათავისუფლების ფორმალური საფუძველი იმდენად ნაჩქარევად მომზადებული და აბსურდულია და თან დროშიც ამ ამბებს ემთხვევა, რომ სხვა ვარაუდის გაკეთების საშუალებას არ მაძლევს.
რაც შეეხება ფორმალურ მხარეს:
1. დამითხოვეს რეორგანიზაციით, რომელიც, არც მეტი არც ნაკლები, მხოლოდ ერთ შტატზე, ანუ ჩემი – დეპარტამენტის უფროსის მოადგილის შტატზე გამოაცხადეს და ის სამხედროდ გადააკეთეს;
2. იმ ფონზე, როცა სამოქალაქო ოფისის არცერთ წამყვან დეპარტამენტში არ ჰყავთ სამხედრო შტატის მოადგილე, სადაც მართლა სჭირდებათ ამ კვალიფიკაციის ხალხი, ჩემთან რატომ გადაწყვიტეს, გაუგებარია;
3. ეს დეპარტამენტი იყო სამოქალაქო ოფისში ერთადერთი, რომელსაც ჰქონდა მოადგილის მხოლოდ ერთი შტატი და სურვილის შემთხვევაში, სამხედრო მოადგილის დამატება შეიძლებოდა აბსოლუტურად უპრობლემოდ;
4. თუ მეორე მოადგილეს რაიმე მიზეზით ვერ ამატებდნენ, რეორგანიზაციის მომენტში დეპარტამენტში არსებობდა რამდენიმე ვაკანსია, მათ შორის სამმართველოს უფროსის მოადგილის, უპრობლემოდ შეიძლებოდა იმ შტატების გადაკეთება სამხედროდ, თუ მაინცდამაინც სამხედროს ყოფნის ამოცანა ედგა ვინმეს.ახლა დავუშვათ, რომ მე ვერ ვართმევდი რამეს თავს, აქ მე რას ვფიქრობ ჩემს თავზე კი არა, თავდაცვის სამინისტროსვე დადგენილი კრიტერიუმებით, მხოლოდ ფაქტები:
1. მარტო ბოლო წელიწადში რამდენიმე ჯილდო და მადლობა მაქვს მიღებული;
2. არცერთი სიტყვიერი შენიშვნა;
3. ამერიკის თავდაცვის უნივერსიტეტი (NDU), სტრატეგიული უსაფრთხოების კვლევების მაგისტრატურა – GPA 3.94/4.00 (ამ ბოლოს ჩვეულებრივ ვითარებაში არ დავწერდი, რადგან GPA არ მიმაჩნია მთავარ ამბად განათლებაში, უბრალოდ ესეც გაზომვადი ინდიკატორია). აქვე შეგახსენებთ, ამერიკის თავდაცვის დეპარტამენტმა სწავლა სწორედ იმ მიზნით დამიფინანსა, რომ თავდაცვის სამინისტროში მემუშავა. თუმცა დღეს, მგონი, ამერიკაში განათლება “კომპრომატად”იქცა ქვეყანაში და თუ გგონიათ, რომ თავდაცვის ლიდერშიპამდე არ აღწევს ეგ განწყობები, ცდებით“, – წერს გიორგი შაიშმელაშვილი სოციალურ ქსელში.
როგორც გიორგი შაიშმელაშვილი აცხადებს, თავად არც პირველია და არც ბოლო, ვისაც საჯარო სამსახურიდან უსამართლოდ უშვებენ.
„სქემა მარტივია, რომელიღაც დაწინაურებული “მლადში ოპერი”, თავის არსებობა რომ გაამართლოს, დაწერს “ცნობას” და მიიტანს “ცეხავიკ” უფროსამდე, რომელსაც, ფულის კეთების გარდა, არც არაფერი აინტერესებს, მაგრამ რადგან მისი ძალაუფლება “მლადში ოპერის” თვალზე და ყურზე დგას, ხანდახან უნდა დაეთანხმოს შეტანილ ცნობას. თანხმობის შემდეგ ხდება საინტერესო- როგორც წესი, ოპერი და ცეხავიკი არსად ჩანან და საქმეს “საჯარო მოხელეები” ამთავრებენ. ალბათ, არ გაგიკვირდებათ, თუ ვიტყვი, რომ ეს მოხელეები (შე)უცვლელი ხალხია დღეს “ქოცები” არიან, გუშინ “ნაცები” იყვნენ და ასე იქნება ალბათ კიდევ მომავალშიც“, – წერს გიორგი შაიშმელაშვილი სოციალურ ქსელში.
ნეტგაზეთი აღნიშნულთან დაკავშირებით ცდილობს თავდაცვის სამინისტროსთან დაკავშირებას. მათი პასუხის მიღებისთანავე მასალა განახლდება.
