სამედიცინო და ფარმაცევტული საქმიანობის რეგულირების სააგენტოს ცნობით, უწყებამ ბაზრიდან გამოითხოვა კომპანია Marion Biotech-ის მიერ წარმოებული პრეპარატი, ნოლგრიპ ჯუნიორი – NOLGRIPP Junior.
როგორც უწყებაში განმარტავენ, გადაწყვეტილების მიზეზი გახდა ჯანდაცვის მსოფლიო ორგანიზაციის რეკომენდაცია. რეკომენდაციის თანახმად, იმავე მწარმოებლის სამკურნალო პრეპარატები – DOK-1 Max და AMBRONOL – მინარევის სახით შეიცავდა დიეთილენ გლიკოლს და/ან ეთილენგლიკოლს. აღნიშნული ნივთიერებები ტოქსიკურია ადამიანისთვის და მისი მოხმარება შესაძლოა ფატალურიც გახდეს.
„საზოგადოების ინფორმირებისთვის განვმარტავთ, რომ ზემოაღნიშნული წამლების რეალიზაცია საქართველოს ბაზარზე არ ხდება. თუმცა რეგულირების სააგენტომ შეაჩერა და ბაზრიდან გამოითხოვა იმავე მწარმოებლის სხვა პრეპარატი.
ფარმაცევტული პროდუქტის იმპორტიორებსა და რეალიზატორებს დაევალათ, შეაჩერონ წამლის რეალიზაცია, გამოითხოვონ ბაზრიდან და გატარებული ღონისძიებების შესახებ ინფორმაცია წარუდგინონ სამედიცინო და ფარმაცევტული საქმიანობის რეგულირების სააგენტოს“, – აცხადებენ უწყებაში.
