შეერთებული შტატების ელჩი საქართველოში, კელი დეგნანი აცხადებს, რომ მიხეილ სააკაშვილის სასამართლო პროცესი პირადი ინფორმაციისა და სამართლიანი სასამართლოს უფლებების დაცვით უნდა გაგრძელდეს.

„მთავრობას აქვს პასუხისმგებლობა, რომ მისი [მიხეილ სააკაშვილის] უფლებები დაცული იყოს, რომ მან მიიღოს ის სამედიცინო დახმარება, რაც ესაჭიროება და დაცული იყოს სამართლიანი სასამართლო პროცესით უზრუნველყოფის უფლება“, – განუცხადა ელჩმა დეგნანმა ჟურნალისტებს 15 დეკემბერს.

„სასამართლო გრძელდება. სამართლებრივი პროცესი უნდა გაგრძელდეს ადამიანის ძირითადი უფლებების დაცვით, ასევე, პირადი ინფორმაციის და სამართლიანი სასამართლო პროცესის უფლებების დაცვით“, – განაცხადა ელჩმა.

თბილისის საქალაქო სასამართლოში ექსპრეზიდენტ მიხეილ სააკაშვილისთვის სასჯელის გადავადების საქმეზე სასამართლო პროცესზე 14 დეკემბერს, – იმის მიუხედავად, რომ წინა პროცესზე მოსამართლე გიორგი არევაძემ მოითხოვა სააკაშვილის დისტანციურად ჩართვა, თუ კლინიკა მისი ტრანსპორტირების რეკომენდაციას კვლავ არ გასცემდა, – სააკაშვილი კვლავ ვერ ჩართეს.

„შესაბამის ტექნიკურ საშუალებებს სჭირდება შესაბამისად გამართვა. ამ ეტაპზე კლინიკა „ვივამედში“ პენიტენციურ სამსახურს არ აქვს შესაბამისი ტექნიკური მოწყობილობები და სწორედ ამ მიზეზიდან გამომდინარ ვერ მოხდა ჩართვა“, — განაცხადა პენიტენციური სამსახურის წარმომადგენელმა ნიკა აბრამიშვილმა.

სპეციალურმა პენიტენციურმა სამსახურმა 14 დეკემბერს ასევე გაავრცელა პატიმრობაში მყოფი მიხეილ სააკაშვილის კადრები.