დღეს, 18 ნოემბერს, პარლამენტში ინტერპელაციის წესით პრემიერ-მინისტრ ირაკლი ღარიბაშვილს უსმენენ.
ღარიბაშვილი ოპოზიციონერი დეპუტატების: გიორგი ვაშაძის, პაატა მანჯგალაძის, თეონა აქუბარდიას, ხათუნა სამნიძის, ტარიელ ნაკაიძის, თამარ კორძაიას, როსტომ ჩხეიძის და ნატო ჩხეიძის მიერ გაგზავნილ კითხვებს უპასუხებს.
შეკითხვები შეეხება საქართველოსთვის ევროკავშირის კანდიდატი ქვეყნის სტატუსის მინიჭებას და „ქართული ოცნებისა“ და „ხალხის ძალის“ დეპუტატების მიერ გაკეთებულ განცხადებებს.
დღეს პარლამენტში სიტყვით გამოსვლისას „სტრატეგია აღმაშენებლის“ წევრმა გიორგი ვაშაძემ „ქართული ოცნების“ ხელისუფლება გააკრიტიკა და განაცხადა, რომ ხელისუფლების არჩევანი „რუსეთის მონობა და ლაჩრობაა“.
ვაშაძის გამოსვლას პარლამენტში უმრავლესობის წევრების მხრიდან ხმაური მოჰყვა.
„ჩვენი არჩევანი არის ძლიერი საქართველოს არჩევანი, საქართველო, სადაც ყველა მოქალაქეს აქვს საკუთარი თავის რეალიზების შესაძლებლობა. თქვენი არჩევანი, უმრავლესობის წარმომადგენლების, არის რუსეთის მონობის არჩევანი, ლაჩრობის არჩევანი. ჩვენი არჩევანი არის ღირსეული, ძლიერი, ერთიანი საქართველოს არჩევანი, სადაც ღირსეული და თავისუფლების მოყვარული ადამიანები ცხოვრობენ. თქვენი არჩევანი არის საქართველოს არჩევანი, რომელიც გინდათ, დაიმორჩილოთ და დაამონოთ, მაგრამ ამას ვერასდროს ვერ ეღირსებით.
იმიტომ, რომ რაც უნდა დეზინფორმაციული კამპანია აწარმოოთ, ქართული ევროპული გენეტიკა არ მოგცემთ ამ გზიდან გადახვევის შესაძლებლობას“, – მიმართა ვაშაძემ უმრავლესობის წევრებს.
ვაშაძის თქმით, 24 თებერვლიდან, მას შემდეგ რაც უკრაიანაში რუსეთის სრულმასშტაბიანი ომი დაიწყო, საქართველოს ისტორიისთვის დაიწყო ათვლის ახალი ეტაპი. მისი თქმით, ამ დროიდან მოყოლებული დაიწყო „ქართული ოცნების“ სრული ლუსტრაცია, რაც გამოიხატებოდა ხელისუფლების მხრიდან კონკრეტული ნაბიჯების გადადგამაში, რათა საქართველოს მიეღო ევროკავშირის წევრობის კანდიდატის სტატუსი.
24 თებერვალს, როცა მთელი მსოფლიო გულშემატკივრობდა უკრაინას, სამწუხაროდ, თქვენი მოღალატეობრივი ქმედების შედეგად თქვენ აჩვენებდით, რომ საქართველო თითქოს არ გულშემატკივრობდა მას. სწორედ 24 თებერვლის შემდეგ დაიწყეთ მტკიცება, რომ ევროკავშირში გაწევრიანების დაჩქარებული პროცესი არ არსებობს“, – განაცხადა ვაშაძემ.
ვაშაძის პასუხად პრემიერ-მინისტრმა ირაკლი ღარიბაშვილმა განაცხადა, რომ მისი გამოსვლა ფარისევლობის და სიყალბის პერფორმანსი იყო.
ღარიბაშვილის თქმით, მას ეგონა, რომ ვაშაძე საკუთარ თავზე საუბრობდა.
„ჩვენ ახლა მოვისმინეთ ბატონი გიორგი ვაშაძის ემოციური გამოსვლა, რა თქმა უნდა, მე არ ვაპირებ ემოციების დახარჯვას და ენერგიის დაზოგვა მაქვს გადაწყვეტილი, ერთი რამ მინდა გითხრათ, ბატონო გიორგი, თქვენი დღევანდელი გამოსვლა იყო ფარისევლობის და სიყალბის პერფორმანსი და მაგალითი იმისა, თუ როგორ არ უნდა მოიქცეს პოლიტიკოსი, ესაა ფარისევლობა, ესაა სიყალბე და ტყუილი, რასაც თქვენ აკეთებთ და რაც თქვენ ახლა ჩაიდინეთ.
ამას გარდა, თქვენ, რა თქმა უნდა, შეურაცხყოფა მიაყენეთ ჩვენს საზოგადოებას, ჩვენი მოსახლეობის აბსოლუტურ უმრავლესობას, ჩვენს დეპუტატებს, ჩვენ ყველას. ამ დროს რეალურად მე მქონდა განცდა, რომ თქვენ საკუთარ თავზე ლაპარაკობდით“,- განაცხადა ღარიბაშვილმა.