ახალი ამბები

“ფაბრიკაში” ქალზე ძალადობის საქმეზე რუსეთის მოქალაქე დააკავეს

14 ნოემბერი, 2022 • 1042
“ფაბრიკაში” ქალზე ძალადობის საქმეზე რუსეთის მოქალაქე დააკავეს

12 ნოემბერს თბილისში, “ფაბრიკაში” მომხდარ ძალადობის ფაქტთან დაკავშირებით ერთი პირი დააკავეს. “ნეტგაზეთის” ინფორმაციით, დაკავებულია რუსეთის მოქალაქე.

“ფაბრიკაში” ქალზე ძალადობის შესახებ სოციალურ ქსელში ერთ-ერთმა მომხმარებელმა, ანა ჯაფარიძემ 12 ნოემბერს გამოაქვეყნა პოსტი. ის პოსტში ყვებოდა, რომ შემთხვევა პარასკევს, 11 ნოემბერს მოხდა:

“ფაბრიკაში ერთი ჩვეულებრივი პარასკევი საღამო, 23:00 საათი, 3 გოგონა (20-დან 23 წლამდე) მოსულია ერთმანეთთან საურთიერთოდ და ისტორიების მოსაყოლად. ამ დროს მოდის საკმაოდ არაფხიზელ მდგომარეობაში სლავური გარეგნობის ბიჭი ერთ-ერთ გოგონასთან, უნდა, რომ წაეცეკვოს, გოგონა უარს ეუბნება, ამ დროს ბიჭი ხელებს ჰკიდებს გოგონას და მისკენ იზიდავს. გოგონა უძალიანდება, ბიჭი იწევს თმებისკენ და ისე ებღაუჭება, რომ 4 ადამიანი ცდილობს გოგონა გამოგლიჯოს ბიჭს/ ამ გაწევ-გამოწევაში ბიჭი ძირს ეცემა, მაგრამ გოგონას თმას ხელს არ უშვებს, ორივე ძირს ვარდებიან და მიუხედავად ხალხის ძალისხმევისა, ბიჭი გოგონას ძირს თმებით ათრევს… როგორც იქნა, მოვიდა დაცვა და ბიჭი გაათრიეს”, – წერს ანა ჯაფარიძე.

შინაგან საქმეთა სამინისტროს ცნობით, მომხდართან დაკავშირებით გამოძიება სისხლის სამართლის კოდექსის 126-ე მუხლით მიმდინარეობს, რაც ძალადობას გულისხმობს.

მასალების გადაბეჭდვის წესი