ისრაელის თავდაცვის მინისტრ ბენი განცის განცხადებით, ისრაელს არ აქვს საწარმოო შესაძლებლობები, უკრაინას საჰაერო თავდაცვის სისტემები მიაწოდოს.
ისრაელმა უკრაინას გაუგზავნა ჰუმანიტარული დახმარება და სამედიცინო აღჭურვილობა, მაგრამ ამ დრომდე უარს ამბობს ლეტალური იარაღის გაგზავნაზე.
„აშკარაა, რომ თუნდაც გადაწყდეს ჩვენი პოლიტიკის შეცვლა, შეუძლებელია ჩვენი საჰაერო თავდაცვის სისტემების მარაგების დაცლა. ჩვენ ყოველდღე ვამოწმებთ, რა შეიძლება გაკეთდეს და როგორ გავაფართოოთ ჩვენი დახმარება, მაგრამ არ უნდა დაგვავიწყდეს, რომ უკრაინის უკან ნატო დგას“, — განაცხადა განცმა The Jerusalem Post-ის ცნობით.
ისრაელის საჰაერო თავდაცვის სისტემები, მათ შორის, „რკინის გუმბათი“ და ისრის სისტემები, შეერთებულ შტატებთან ერთობლივად იწარმოება.
კიევი ითხოვს ისრაელისგან საჰაერო თავდაცვის სისტემების მიწოდებას, განსაკუთრებით მას შემდეგ, რაც რუსეთმა უკრაინაში ირანული წარმოების დრონების გამოყენება დაიწყო.