რუსეთში ნაწილობრივი მობილიზაციის დაწყებიდან დე ფაქტო სამხრეთ ოსეთის ორმაგი მოქალაქეობის მქონე 30-მდე მცხოვრები რუსეთიდან ცხინვალში არ შეუშვეს, რადგანაც რუსეთში სამხედრო აღრიცხვის გამო მობილიზაციაში გაწვევას ექვემდებარებიან. ამის შესახებ გამოცემა ეხოკავკაზა წერს.
გამოცემა წერს, რომ აღნიშნული საკითხი სამხრეთ ოსეთის დე ფაქტო პარლამენტმა განიხილა, სადაც საგარეო კომიტეტის ხელმძღვანელმა ზაზა დრიაევმა განაცხადა, რომ მისმა უწყებამ რუსეთის საელჩოს უკვე გაუგზავნა ნოტა და პასუხიც მიიღო. მისი თქმით, რუსი დიპლომატები ეყრდნობიან რუსეთის მთავრობის 2006 წლის დადგენილებას “სამხედრო აღრიცხვის” შესახებ, რომლის შესაბამისად, გაწვევა არ შეეხება იმ პირებს, რომლებიც მუდმივად არ ცხოვრობენ რუსეთის ტერიტორიაზე და, შესაბამისად, არ დგანან აღრიცხვაზე. სხვა შემთხვევაში კი, გაწვევა რუსეთის მოქალაქეობის მქონე იმ ყველა პირს შეეხება, ვინც გაწვევის კრიტერიუმებს აკმაყოფილებს.
21 სექტემბრის შემდეგ, რაც რუსეთის პრეზიდენტმა “ნაწილობრივი მობილიზაცია” გამოაცხადა, რუსეთის მოქალაქეობის მქონე აფხაზებისა და ოსების ომში გაწვევაზე სოხუმსა და ცხინვალში არაერთი ურთიერთსაწინააღმდეგო პროგნოზი და მოსაზრება ისმის. ამ ეტაპზე არსებული ინფორმაცით, მობილიზაცია მათ არ ეხებოდათ.
