ახალი ამბები

შოიგუს შვილს ლიეტუვის მოქალაქეობა აქვს — LRT

17 ოქტომბერი, 2022 • 470
შოიგუს შვილს ლიეტუვის მოქალაქეობა აქვს — LRT

ლიეტუვის საზოგადოებრივი მაუწყებლის (LRT) ინფორმაციით, რუსეთის თავდაცვის მინისტრ სერგეი შოიგუს ყოფილი მეგობარი ქალი უჩივის ლიეტუვის ბინადრობის ნებართვის გაუქმების გამო, შოიგუს ქალიშვილს კი ლიეტუვის მოქალაქეობა აქვს.

კამინსკასმა ამ ზაფხულს დაკარგა ლიეტუვური ბინადრობის ნებართვა, რის შემდეგაც მიგრაციის დეპარტამენტს უჩივლა. ვილნიუსის რეგიონულ ადმინისტრაციულ სასამართლოს საქმის განხილვა ჯერ არ დაუნიშნავს.

სახელმწიფო უსაფრთხოების დეპარტამენტიმა LRT-ის საგამოძიებო ჯგუფს განუცხადა, რომ მათი დასკვნით, კამინსკასის ლიეტუვაში ყოფნამ, რუსეთთან მისი კავშირების გამო, შესაძლოა, საფრთხე შეუქმნას ეროვნულ უსაფრთხოებას.

LRT-ის ცნობით, სერგეი შოიგუს ყოფილ მეგობარ ქალ ელენა კამინსკასთან (წარსულში შებუნოვა) ორი შვილი ჰყავს, რომელთაგან ერთი ჯერ კიდევ არასრულწლოვანია. ქალს ასევე ჰყავს ორი შვილი ლიეტუვის მოქალაქე ადოლფას კამინსკასთან ქორწინებიდან. მისი ოთხი შვილიდან სამს ლიეტუვის მოქალაქეობა აქვს. ლიეტუვის საზოგადოებრივი მაუწყებლის მონაცემებით, შოიგუს უფროსმა შვილმა ლიეტუვის მოქალაქეობა 2019 წელს მიიღო, დედის კამინსკასთან ქორწინების შემდეგ, რომელმაც იგი თავის ქალიშვილად აღიარა.

შოიგუს ყოფილმა მეგობარმა ქალმა, რომელიც რუსეთის მოქალაქეა, ლიეტუვაში ბინადრობის ნებართვა 2017 წელს მიიღო. 2022 წლის აგვისტოში მან, მისმა მეუღლემ და მათმა უმცროსმა შვილმა რუსეთში გადასახლების შესახებ განაცხადეს. რუსეთის ოფიციალური რეესტრის მიხედვით, ადოლფას კამინსკასმა რუსული პასპორტი ამ გაზაფხულზე მიიღო.

ელენა და ადოლფას კამინსკასს რამდენიმე ბიზნესი აქვთ რუსეთში. The Insider-ის ცნობით, შებუნოვამ მნიშვნელოვანი სიმდიდრე შეიძინა შოიგუსთან ურთიერთობის დროს — კომპანიებმა, რომლებშიც წილებს ფლობდა, სახელმწიფო შეკვეთები მიიღეს თავდაცვისა და საგანგებო სიტუაციების სამინისტროებიდან.

მასალების გადაბეჭდვის წესი