დღეს, 27 სექტემბერს, სოხუმის დაცემის დღეს, თბილისში უკრაინისა და საქართველოს ტერიტორიული მთლიანობის მხარდასაჭერად მსვლელობა გაიმართა.
აქციის მონაწილეები შოთა რუსთაველის ძეგლთან შეიკრიბნენ და რუსთაველის გმაზირის გავლით პარლამენტთან გადაინაცვლეს. აქციაზე შესრულდა საქართველოსა და უკრაინის ჰიმნებიც:
„27 სექტემბერს სოხუმი დაეცა. 29 წლის წინ რუსეთმა საქართველოს – აფხაზეთი, ათასობით ქართველს კი სიცოცხლე წაართვა.
გენოციდს გამოქცეული ასიათასობით ადამიანი ისევ დევნილია და სახლში ვერ მიდის. დღეს უკრაინელების თავგანწირვამ შექმნა ისტორიული შანსი, რომ რუსეთი დამარცხდეს და პოლიტიკურად შეუძლებელი პოლიტიკურად გარდაუვლად იქცეს – ქართველები შინ დავბრუნდეთ. ჩვენ ამისთვის უნდა ვემზადოთ“ ,- აცხადებენ აქციის ორგანიზატორები.
მსვლელობა საქართველოსა და უკრაინის ტერიტორიული მთლიანობის მხარდასაჭერად „ევროპული საქართველოს“, „ტაბულას“, „აფხაზთა კრების“, ამომრჩეველთა განათლების საზოგადოების“, „თავისუფლების ინსტიტუტისა“ და უკრაინელი აქტივისტების ორგანიზებით გაიმართა.
