ფინანსთა სამინისტროს საგამოძიებო სამსახური იუწყება, რომ მცხეთა-მთიანეთის რეგიონში ქრთამის აღების ბრალდებით ერთი პირი დააკავეს.

დაკავებულია გარემოს დაცვისა და სოფლის მეურნეობის სამინისტროს დაქვემდებარებაში არსებული „ეროვნული სატყეო სააგენტოს“ ერთ-ერთი სატყეო უბნის თანამშრომელი.

გამოძიების ვერსიით, სააგენტოს თანამშრომელმა სამსახურებრივი მოვალეობების შესრულებისას, „მის სამოქმედო ტერიტორიიდან კაკლის ხის უნებართვოდ მოპოვებისა და  გატანის სანაცვლოდ“, მოქალაქეს ქრთამის სახით მოსთხოვა და გამოართვა 1 000 ლარი.

საგამოძიებო სამსახურის თანახმად, იგი სწორედ ამ დროს დააკავეს.

გამოძიება ქრთამის აღების მუხლით (სსკ 338-ე) მიმდინარეობს და ბრალდებულს 6-დან 9 წლამდე პატიმრობა ემუქრება.