ახალი ამბები

გამოავლინეთ 5 ივლისის ძალადობის ორგანიზატორები, შეწყდეს დევნა – მედიაკოალიცია

5 ივლისი, 2022 • 284
გამოავლინეთ 5 ივლისის ძალადობის ორგანიზატორები, შეწყდეს დევნა – მედიაკოალიცია

ჟურნალისტებზე 5-6 ივლისის ძალადობიდან ერთი წლისთავზე „მედიის ადვოკატირების კოალიცია“  აცხადებს, რომ გამოძიებას დღემდე არ გამოუვლენია და არ დაუსჯია თავდასხმის ორგანიზატორები , რის ფონზეც მედიის წარმომადგენლები ხშირად ხდებიან „პოლიტიკოსების თუ წახალისებული მოძალადეების სიტყვიერი ან/და ფიზიკური თავდასხმის მსხვერპლები“.

„ერთი წლის წინ, 2021 წლის 5 და 6 ივლისს, ქართულ ჟურნალისტიკაში ყველაზე მძიმე დღეები იყო, რა დროსაც პროფესიული მოვალეობის შესრულებისას ჰომოფობიური და მოძალადე ჯგუფების მასობრივი თავდასხმის შედეგად მედიის 53 წარმომადგენელი დაშავდა. 11 ივლისს საკუთარ სახლში გარდაცვლილი იპოვეს „TV პირველის“ ოპერატორი ლექსო ლაშქარავა. ოპერატორი 5 ივლისის თავდასხმების დროს სიძულვილის ჯგუფებმა სასტიკად სცემეს – მიიღო ტვინის შერყევა, ჩამტვრეული ჰქონდა სახის ძვლები და ჩაუტარდა ქირურგიული ოპერაცია“, – წერს კოალიცია.

„გამოძიებას 5 და 6 ივლისის თავდასხმის ორგანიზატორები ერთი წლისთავზე კვლავ არ გამოუვლენია და, შესაბამისად, არ დაუსჯია. პასუხისმგებლობაში მიცემული არ არიან უშუალოდ ძალადობაში მონაწილეთა ნაწილიც. დაუსჯელობის სინდრომმა კიდევ უფრო გააუარესა მედიაგარემო საქართველოში: მუქარა, შევიწროება, უკანონო მოსმენა-მიყურადება და თვალთვალი, ზეწოლა, დისკრიმინაცია, დისკრედიტაცია, ფიზიკური თავდასხმა, ბრიფინგებზე ჟურნალისტების შერჩევით დაშვება – ეს დარღვევების მცირე ჩამონათვალია“, – აცხადებს „მედიის ადვოკატირების კოალიცია“.

კოალიციის თანახმად, დღეს ჟურნალისტები და მედიის წარმომადგენლები ხდებიან სამიზნე ხელისუფლების მიმართ კრიტიკული სარედაქციო პოლიტიკის გამო, – „მათ სიცოცხლის და ჯანმრთელობისთვის საშიშ გარემოში უწევთ პროფესიული მოვალეობის შესრულება, თითქმის ყოველდღე ხდებიან პოლიტიკოსების თუ წახალისებული მოძალადეების სიტყვიერი ან/და ფიზიკური თავდასხმის მსხვერპლები. საფრთხის ქვეშ ცხოვრობენ მათი ოჯახის წევრებიც“.

ამასთან, კოალიციის განცხადებით, ჟურნალისტებს ეზღუდებათ საჯარო ინფორმაციაზე წვდომა, – „განსაკუთრებით იმ შემთხვევაში, როცა ისინი იკვლევენ ხელისუფლების მიერ ძალაუფლების ბოროტად გამოყენების, ადამიანის უფლებების დარღვევის, კორუფციის, ბიუჯეტის არასწორი მართვის თუ დანაშაულებრივი საქმიანობის შემთხვევებს“.

კოალიცია ახსენებს ასევე „მთავარი არხის“ დირექტორის, ნიკა გვარამიას დაპატიმრებას, „რომლის გამამტყუნებელ განაჩენსაც შიდა და საერთაშორისო ორგანიზაციები პოლიტიკურად მოტივირებულად მიიჩნევენ“.

კოალიცია აცხადებს, რომ სახელმწიფო ვალდებულია, ეროვნული და საერთაშორისო კანონმდებლობის მოთხოვნების შესაბამისად, დაიცვას მედიის დამოუკიდებლობა და პლურალიზმი, და მოუწოდებს ხელისუფლებას:

  • „გამოავლინოს და სათანადოდ დასაჯოს 5-6 ივლისის მოვლენების დროს დანაშაულებრივი ქმედებების უშუალო ჩამდენები და ორგანიზატორები. სწრაფად და ეფექტიანად გამოიძიოს ჟურნალისტების წინააღმდეგ მომრავლებული თავდასხმები, მათ პროფესიულ საქმიანობაში უკანონო ხელშეშლის ფაქტები და სისხლისსამართლებრივ პასუხისგებაში მისცეს შესაბამისი პირები;
  • შეწყდეს კრიტიკული მედიასაშუალებების მიმართ მიმდინარე პოლიტიკურად მოტივირებული გამოძიებები და სასამართლო პროცესები. ციხიდან გათავისუფლდეს ტელეკომპანია „მთავარი არხის“ დირექტორი და დამფუძნებელი ნიკა გვარამია;
  • გამოიძიოს მედიის წარმომადგენლების მასობრივი უკანონო ფარული მოსმენა-მიყურადების და თვალთვალის საქმეები“.

მასალების გადაბეჭდვის წესი