საქართველოს პრემიერ-მინისტრის, ირაკლი ღარიბაშვილის განცხადებით, საქართველოს შესახებ ევროპარლამენტის მიერ მხარდაჭერილი, ხუთი ჯგუფის მიერ ინიცირებული რეზოლუცია არის „ანტიქართული“ და „ანტისახელმწიფოებრივი“.
მისი განცხადებით, იმ შემთხვევაში, თუ „ნაციონალურ მოძრაობას“ გული შესტკიოდა ქვეყნის მომავალზე, უნდა მოეწოდებინათ ევროპის სახალხო პარტიისთვის, რომ მხარი არ დაეჭირათ მიღებული რეზოლუციისთვის.
ნაციონალური მოძრაობა ევროპის სახალხო პარტიის (EPP) წევრია, თუმცა, გარდა EPP-სა, რეზოლუციის ავტორები ასევე არიან: Verts/ALE (მწვანეები და რეგიონალისტები), S&D (სოციალ-დემოკრატები, რომლის პარტნიორია “ქართული ოცნება”), ECR (კონსერვატორები და რეფორმისტები) და Renew Europe (ლიბერალები).
„თუ ამ ადამიანებს გული შესტკივათ ჩვენი ქვეყნის მომავალზე, რატომ არ მოუწოდეს თავის პარტიას იმისთვის, რომ ასეთი ანტისახელმწიფოებრივი და ანტიქართული რეზოლუცია არ მიეღოთ ევროპარლამენტში.
ჩვენ აქ კითხვები არ გვაქვს, მეგობრებო. ყველას კარგად ესმის ყველაფერი, თუ რას ემსახურებოდა ეს ყველაფერი“, – განაცხადა ირაკლი ღარიბაშვილმა.
მისივე განცხადებით, მას შემდეგ, რაც ნაციონალურმა მოძრაობამ სანქციებზე მიერთებისა და ომში მოხალისეების გაგზავნის მოთხოვნით ვერ შეძლო, საქართველო ჩაერთო ომში, ცდილობს ქვეყნის ინტერესების დაზიანებას.
„ახლა ასეთი მავნებლობითა და ანტისახელმწიფოებრივი ქმედებებით დააზიანონ მთავარი – ჩვენი ქვეყნის ეროვნული ინტერესები“, – განაცხადა ღარიბაშვილმა.