სლოვაკეთი მოკავშირეებთან მოლაპარაკებებს აწარმოებს შეთანხმების მისაღწევად, რომელიც ბრატისლავას საშუალებას მისცემს, უკრაინას საბრძოლო თვითმფრინავები გაუგზავნოს.
ამის შესახებ სლოვაკეთის პრემიერ-მინისტრმა ედუარდ ჰეგერმა განაცხადა.
გასული კვირის ბოლოს უკრაინაში ვიზიტის შემდეგ ჰეგერმა POLITICO-ს უთხრა, რომ მის მთავრობას სთხოვეს, უკრაინისთვის მიეწოდებინა საბჭოთა დიზაინის MiG-29 გამანადგურებელი თვითმფრინავი და სლოვაკური წარმოების „ზუზანა“ თვითმავალი ჰაუბიცები, რაზეც დისკუსიები მიმდინარეობს.
ჰეგერის თქმით, მის მთავრობას სურდა, ნებისმიერ შემთხვევაში თავი დაეღწია MiG-ებზე დამოკიდებულებისგან, რადგან საბჭოთა ტექნიკის შენარჩუნება რუსეთთან „ურთიერთობის“ გარეშე შეუძლებელია, 2024 წელს კი სლოვაკეთი აშშ-ისგან F-16-ებს ელოდება.
„სლოვაკეთი ძალიან ინტენსიურ დისკუსიაშია ჩვენს პარტნიორებთან იმის შესახებ, თუ როგორ დავიცავთ ქვეყნის საჰაერო სივრცეს. ჩვენ შეგვიძლია განვიხილოთ ამ აღჭურვილობაზე საუბარი უკრაინასთან დაკავშირებითაც“, — თქვა სლოვაკეთის პრემიერმა.
კითხვაზე, ნიშნავს თუ არა ეს, რომ შესაძლოა, სლოვაკეთმა უკრაინას თვითმფრინავები გადასცეს, თუ ის მიიღებს გარკვეულ გარანტიებს დასავლელი პარტნიორებისგან, მან უპასუხა: „ამაზე ვსაუბრობთ. დიახ”.
ჰეგერმა არ დაასახელა რიცხვი, თუ რამდენი MiG-ის მიცემა შეუძლია სლოვაკეთს. გავრცელებული ინფორმაციით, ქვეყანას დაახლოებით ათეული ასეთი თვითმფრინავი აქვს.
ბოლო დღეებში ბრატისლავამ უკვე განახორციელა ერთი გაცვლა — უკრაინაში S-300 საჰაერო თავდაცვის სისტემის გაგზავნის სანაცვლოდ ის ამერიკულ „პატრიოტის“ სარაკეტო სისტემას იღებს.