ახალი ამბები

ამერიკა საკუთარ მოქალაქეებს უკრაინის დატოვებისკენ მოუწოდებს

26 იანვარი, 2022 • 1494
ამერიკა საკუთარ მოქალაქეებს უკრაინის დატოვებისკენ მოუწოდებს

მომატებული რუსული საფრთხის გამო, ამერიკის შეერთებული შტატები უკრაინაში მყოფ საკუთარ მოქალაქეებს ქვეყნის დატოვებისკენ მოუწოდებს.

“გაზრდილი რუსული საფრთხის გამო, უსაფრთხოების ვითარება უკრაინაში კვლავ არაპროგნოზირებადია, რაც შეიძლება გაუარესდეს. ამერიკის შეერთებული შტატები საკუთარ მოქალაქეებს უკრაინაში მოუწოდებს, რომ განიხილონ ქვეყნიდან გამგზავრება კომერციული ან სხვა კერძო ტიპის შესაძლო ტრანსპორტით”, – წერია ამერიკის საელჩოს განცხადებაში.

განცხადების მიხედვით, იმ მოქალაქეებს, რომელთაც საკუთარი ხარჯებით არ შეუძლიათ სამგზავრო ბილეთების შეძენა ,საელჩო  სთავაზობს ე.წ. “სამგზავრო სესხებს”, რომელსაც სამშობლოში დაბრუნების შემდეგ გადაიხდიან.

ამერიკის საელჩო მოქალაქეებს ასევე მოუწოდებს, შეავსონ ონლაინ ფორმა, რათა საელჩოს თანამშრომლებმა მათთან კონტაქტი უკეთესად შეძლონ. საელჩოს განცხადებით, ფორმის შევსება განსაკუთრებით მნიშვნელოვანია მაშინ, თუ მოქალაქე უკრაინაში დარჩენას გადაწყვეტს.

რუსეთი უკრაინაზე თავდასხმის გეგმას უარყოფს, თუმცა ბოლო თვეების განმავლობაში 100 000-ზე მეტი ჯარისკაცი განათავსა უკრაინის საზღვართან.

გასული წლის დეკემბერში რუსეთის საგარეო საქმეთა სამინისტრომ გამოაქვეყნა ორი შეთანხმების პროექტი, რომელთაგან ერთი აშშ-ს მიემართება, ხოლო მეორე — ნატოს.

რუსეთი აშშ-სა და ნატოს სთავაზობს შეთანხმებას „უსაფრთხოების გარანტიებზე”, რომელიც ითვალისწინებს ნატოს აღმოსავლეთით გაფართოების პრევენციას, მათ შორის, 2008 წლის ბუქარესტის სამიტის გადაწყვეტილების უარყოფას, რომლის თანახმადაც უკრაინა და საქართველო ნატოს წევრები გახდებიან.

მოსკოვის მოთხოვნაა:

  • არ განთავსდეს დამატებითი ძალები და შეიარაღება იმ ქვეყნებს მიღმა, სადაც ისინი 1997 წლის მაისისთვის, აღმოსავლეთ ევროპის ქვეყნების ნატო-ში გაწევრიანებამდე იყო;
  • არ განთავსდეს რაკეტები იქ, საიდანაც მეორე მხარის ტერიტორიას საფრთხე შეექმნება;
  • უარი ითქვას უკრაინაში, აღმოსავლეთ ევროპაში, ამიერკავკასიასა და ცენტრალურ აზიაში ნატო-ს სამხედრო საქმიანობაზე.

11 იანვარს ჟენევაში აშშ-რუსეთის დიპლომატიური მოლაპარაკებები გაიმართა, 12 იანვარს ბრიუსელში — ნატო-რუსეთის საბჭოს სხდომა, ხოლო 13 იანვარს ვენაში ეუთო-ს მუდმივმოქმედი საბჭოს სხდომა იმართება. ამ მოლაპარაკებებზე რუსეთმა ნატო-ს გაფართოების შეჩერების პირობა ვერ მიიღო.

შეერთებულმა შტატებმა განაცხადა, რომ მზად არის განიხილოს გარკვეული ზომები, როგორიცაა შეიარაღების კონტროლი და სამხედრო წვრთნების მასშტაბები, მაგრამ ეს უნდა იყოს ორმხრივი.

ამასთან, ვაშინგტონმა გამორიცხა აღმოსავლეთ ევროპაში ნატო-ს სამხედრო ყოფნის შესუსტება და რუსეთისთვის გარანტიის მიცემა, რომ ნატო არ გაფართოვდება.

უკრაინაში რუსეთის შესაძლო შეჭრასთან დაკავშირებული შიშების ფონზე, ბოლო პერიოდში ნატოს არაერთმა წევრმა გამოთქვა კიევისათვის შეიარაღების მიწოდებისათვის მზადყოფნა. აშშ-ის სამხედრო დახმარების პირველი პარტია კიევში უკვე ჩავიდა.

ამასთან, აშშ-მა ნება დართო ლიეტუვას, ლატვიასა და ესტონეთს, ამერიკული წარმოების იარაღი მიაწოდონ უკრაინას. ალიანსის არაერთი წევრი — მათ შორის, დიდი ბრიტანეთი და პოლონეთი — თანახმაა, კიევს შეიარაღება პირდაპირ მიაწოდოს.

 

მასალების გადაბეჭდვის წესი