გერმანიაში დაკავებული უკრაინის მოქალაქე ქართველი გენერალის, გიგი კალანდაძის საქმეში უკრაინელი კონსულები ჩაერთვნენ. ამის შესახებ ინფორმაციას გამოცემა “უკრაინსკაია პრავდა” უკრაინის საგარეო საქმეთა სამინისტროს სპიკერ ოლეგ ნიკოლენკოზე დაყრდნობით ავრცელებს.

გამოცემის ცნობით, გერმანიაში უკრაინის საელჩო კალანდაძის დაკავების შესახებ ინფორმირებულია. ამასთან, უკრაინის საკონსულოს გერმანელ სამართალდამცავებთან უკვე აქვს კომუნიკაცია დაკავების მიზეზების გასარკვევად და კალანდაძისთვის შესაბამისი დახმარების გასაწევად. გამოცემის ინფორმაციით, კალანდაძის ინტერესების დაცვაში მისი ადვოკატიც ჩაერთო.

კალანდაძემ უკრაინის მოქალაქეობა პრეზიდენტ ვოლოდიმირ ზელენსკის ბრძანებით 2019 წლის 20 დეკემბერს მიიღო.

საქართველოს გაერთიანებული შტაბის ყოფილი უფროსი გენერალი გიგი კალანდაძე მიმდინარე წლის 19 დეკემბერს ბერლინის აეროპორტში გერმანულმა მხარემ დააკავა. საქართველოს პროკურატურის ცნობით, იგი საქართველოს სამართალდამცავი ორგანოების მიერ იყო ძებნილი.

უწყების ინფორმაციით კალანდაძე სისხლის სამართლის პასუხისგებაშია მიცემული ე.კ.-ს თავისუფლების უკანონო აღკვეთისა და წამების ბრალდებით, საქართველოს სსკ-ის 143-ე მუხლის მე-2 ნაწილის „გ“ და მე-4 ნაწილის „ა“ ქვეპუნქტებით და 144-ე პრიმა მუხლის მე-2 ნაწილის „ა“ და „ბ“ ქვეპუნქტებით და მე-3 ნაწილით.

წარდგენილი ბრალდება სასჯელის სახედ და ზომად თავისუფლების აღკვეთას თორმეტიდან ჩვიდმეტ წლამდე ვადით ითვალისწინებს.

პროკურატურა გერმანიიდან მის ექსტრადიციას მოითხოვს.