ახალი ამბები

რუსთაველის გამზირზე მიხეილ სააკაშვილის მხარდასაჭერად აქცია მიმდინარეობს

9 ნოემბერი, 2021 • 830
რუსთაველის გამზირზე მიხეილ სააკაშვილის მხარდასაჭერად აქცია მიმდინარეობს

რუთაველის გამზირზე, პარლამენტის წინ, მიხეილ სააკაშვილის მხარდასაჭერად აქცია მიმდინარეობს.

აქციის დაწყებისას „ნაციონალური მოძრაობის“ თავმჯდომარე ნიკა მელიამ მათი სამოქმედო გეგმის შესახებ განაცხადა. მისი თქმით, ხვალ, 10 ნოემბერს, 11 საათზე ერთდროულად გაიმართება სამი აქცია: იუსტიციისა და ჯანდაცვის სამინისტროებთან და მოდულის შენობასთან.

მელიას თქმით, ახლა სახლში ჯდომის დრო არ არის და თანდათანობით გაიზრდება აქციის წერტილები და ლოკაციები.

მელიას თქმით, თუკი ხვალ ,პირველ საათზე, ჩანიშნული მიხეილ სააკაშვილის სასამართლო პროცესი თბილისის საქალაქო სასამართლოში გაიმართა, მაშინ აღნიშნული დროისთვის აქცია სასამართლოს ეზოში გადაინაცვლებს.

„ამასთან, მეოთხე ადგილასაც იქნება აქცია, რომელსაც განგებ არ დავასახელებ. ასე იქნება ყოველდღე[აქციები]. რა თქმა უნდა, ბრძოლა იქნება დამღლელი, მაგრამ დიდი ისტორიული გამარჯვებები სხვაგვარად არ მოდის. მე ჩემს მეგობრებთან ერთად მგონია, რომ ღამისთევები და ენერგიის გამოცლა არ არის საჭირო. დილიდან ჩვენ უნდა გამოვაცალოთ ენერგია რეჟიმს და არა ღამის თენებით რუსთაველის გამზირსა და თავისუფლების მოედანზე. აპრობირებული მეთოდი არის ბრძოლის გაშლა სხვადასხვა ფრონტზე. წუწუნის დრო არ არის. ბრძოლის დრო არის. ჩვენ არ გვაქვს არცერთი საათი დასაკარგი.

ნომერი პირველი მიღწევა არის მიშას გადაყვანა სამოქალაქო კლინიკაში. რითიც ელენე ხოშტარიას უკვე მძიმე მდგომარეობას პასუხი გაეცემა და ელენეც შეწყვეტს შიმშილობას. მისი მდგომარეობაც არ არის მარტივი, არანაკლებ მძიმე არის ელენე ხოშტარიას მდგომარეობა ახლა, ვიდრე მიხეილ სააკაშვილის ჯანმრთელობის მდგომარეობა, თუ არა პირიქით, უარესი. ამიტომ არანაირი დაღლა. ყოველი დღის ბოლოს გვექნება მომდევნო დღის გეგმა და შეგატყობინებთ რამდენიმე წერტილთან მიმართებაში. მაგრამ ყოველთვის იქნება ერთი წერტილი, რომელსაც არ დავასახელებთ და იმტვრიონ თავი „ქართულ ოცნებაში“, – განაცხადა მელიამ.

მასალების გადაბეჭდვის წესი