იმუნიზაციის საბჭოს გადაწყვეტილებით “ასტრაზენეკას” ვაქცინით აცრას 45 წელს ზემოთ პირებიც შეძლებენ. ამის შესახებ ჯანდაცვის მინისტრის მოადგილემ თამარ გაბუნიამ საბჭოს დასრულების შემდეგ გამართულ ბრიფინგზე თქვა.
საქართველოში “ასტრაზენეკას” ვაქცინით აცრა ამ დრომდე მხოლოდ 55 წელს ზემოთ მოქალაქეებითვის არის შესაძლებელი. თუმცა, როგორც გაბუნია ამბობს, 45 წელს ზემოთ პირები ვაქცინაზე რეგისტრაციას 12 მაისიდან შეძლებენ.
“იქნა განხილული “ასტრაზენეკას” გამოყენების საკითხი. ამ ვაქცინის გამოყენება ჩვენს ქვეყანაში ჯერჯერობით 55 წელს ზემოთ ხდება. გასულ კვირას გერმანიამ გადაწყვეტილება მიიღო ასაკობრივი შეზღუდვის სრულად მოხსნის შესახებ, თუმცა სხვა ქვეყნები ჯერჯერობით ამ [ზღვარს] ინარჩუნებენ. რისკების შეფასებისა და დამატებითი კონსულტაციების შედეგად საბჭომ მხარი დაუჭირა წინადადებას, რომ ასაკობრივი ზღვარი “ასტრაზენეკასთვის” შემცირდეს 45 წლამდე. ანუ 55 წლის ნაცვლად ხვალ, დღის ბოლოდან, 20:00 საათიდან “ასტრაზენეკათი” ვაქცინაციისთვის რიგის დაჯავშნას შეძლებენ მოქალაქეები 45 წლის და ზემოთ ასაკში”,-განაცხადა გაბუნიამ.
