ევროპის წამლის მარეგულირებლის განცხადებით, ჩინეთის წარმოების COVID-19-ის საწინააღმდეგო ვაქცინა “სინოვაკის” შესწავლას დაიწყებს.
როგორც Reuters წერს, ევროპის წამლის სააგენტო შეისწავლის ვაქცინის მიერ ნაჩვენებ შუალედურ შედეგებს როგორც ცხოველებში ასევე ადამიანებში ჩატარებული ტესტირების დროს და დაადგენს, რამდენად ეფექტურია ის კორონავირუსის წინაარმდეგ.
სააგენტოს განცხადებით, შეფასება მონაცემების გასაჯაროების შემდეგ დაიწყება, რაც დააჩქარებს ვაქცინისთვის ავტორიზაციის პოტენციურ მინიჭებას.
Reuters-ის თქმით, აღნიშნული პროცედურა შესაძლებლობას აძლევს მკვლევრებს, გამოაქვეყნონ პრეპარატთან დაკავშირებული მიგნებები რეალურ დროში, მანამ, სანამ საბოლოო კვლევის შედეგები გახდება ხელმისაწვდომი.
გამოცემა წერს, რომ სინოვაკი ჩინური წარმოების პირველი ვაქცინა იქნება, რომლის შესწავლასაც ევროპის წამლის სააგენტო დაიწყებს. აღნიშნულ პროცედურას ამჟამად სააგენტოში ნოვავაქსის და რუსული წარმოების სპუტნიკის ვაქცინებიც გადიან.
Reuters-ის თქმით, “სინოვაკმა” სხვადსხვა კვლევებში 50-დან 90%-მდე ეფექტურობა აჩვენა და ამჟამად გამოიყენება ჩინეთში, ინდონეზიაში, ბრაზილიასა და თურქეთში.
ვაქცინა კორონავირუსული ინფექციის გამომწვევი ვირუსის ინაქტივირებული ვერსიითაა შექმნილი. აღნიშნული ვაქცინის 100 000 დოზა საქართველომ სხვა ჩინური წარმოების ვაქცინის, “სინოფარმის” შეძენის შემდეგ ჩინეთისგან საჩუქრად მიიღო.
