ამერიკის შეერთებული შტატების საელჩო აცხადებს, რომ გმობს ტელეკომპანია ფორმულას თანამშრომლებზე გუშინდელ „თავდასხმისა და ვანდალიზმის ფაქტს“.
„ამას წინ უსწრებდა, თებერვალში, ფორმულას ჟურნალისტის, ვახო სანაიას ცემის ინციდენტი“, – აღნიშნავს საელჩო და ხელისუფლებას მოუწოდებს, „ჩაატაროს ამ შემთხვევების სწრაფი, სრულყოფილი და მიუკერძოებელი გამოძიება“.
„თავდასხმა ჟურნალისტებზე მიუღებელია. დემოკრატიულ სახელმწიფოებში ჟურნალისტებს უნდა ჰქონდეთ თავისუფლება და შეეძლოთ საქმიანობის უსაფრთხოდ განხორციელება“, – წერია 9 აპრილს გავრცელებულ განცხადებაში.
საელჩოს თანახმადვე, „სასიცოცხლოდ მნიშვნელოვანია, რომ მათ შეძლონ სამსახურებრივი მოვალეობების შესრულება საზოგადოების ინფორმირების, სახელმწიფო ინსტიტუციებისა და მთავრობის ანგარიშვალდებულების უზრუნველსაყოფად“.
ტელეკომპანია „ფორმულაში“ აცხადებენ, რომ გუშინ, 8 აპრილს, მათ ორ თანამშრომელს თავს დაესხნენ — ერთს მანქანა დაუზიანეს, ხოლო მეორეს ფიზიკური შეურაცხყოფა მიაყენეს.
შინაგან საქმეთა სამინისტრო ამბობს, რომ „ფორმულას“ თანამშრომელზე ფიზიკური ძალადობის შესახებ უწყებაში შეტყობინება არ შესულა, ხოლო მანქანის დაზიანების ფაქტზე გამოძიება დაიწყო.
ვრცლად:
სანაიაზე თავდასხმის საქმეში ბრალდებულებს აღკვეთის სახით პატიმრობა შეეფარდათ