ნეტგაზეთი | ოპოზიციური პარტიები “ოცნებას” მიმართავენ მოლაპარაკებების მაგიდას დაუბრუნდეს ოპოზიციური პარტიები “ოცნებას” მიმართავენ მოლაპარაკებების მაგიდას დაუბრუნდეს – Netgazeti
Batumelebi | RU

ოპოზიციური პარტიები “ოცნებას” მიმართავენ მოლაპარაკებების მაგიდას დაუბრუნდეს

10 ოპოზიციური პარტია “ქართულ ოცნებას” მიმართავს, რომ მოლაპარაკებების მაგიდას დაუბრუნდეს. პარტიები ერთობლივ განცხადებას ავრცელებენ, სადაც აღნიშნავენ, რომ  ერთგული რჩებიან იმ პოზიციისა, რაც “გაყალბებული საპარლამენტო არჩევნებისა და ივანიშვილის მიერ ქართველი ხალხის ნების მიტაცების შემდეგ” დაიკავეს.

მათი თქმით, 31 ოქტომბერს ჩატარებული საპარლამენტო არჩევნების ოფიციალური შედეგები არ გამოხატავს საქართველოს მოქალაქეთა ნებას და, შესაბამისად, ამ არჩევნების შედეგების აღიარება მხოლოდ და მხოლოდ პოლიტიკური პროცესის მიმართ “ოცნების” მიერ  წახალისებულ ნიჰილიზმსა და დემოკრატიული პროცესისადმი სრულ უნდობლობას გამოიწვევს.

“მიუხედავად დღევანდელი პარლამენტის მიმართ ბოიკოტის რეჟიმში მყოფ პარტიებს შორის არსებული განსხვავებებისა, ჩვენ საერთო პოზიცია და მოთხოვნები არჩევნების შედეგების გაყალბებიდან მალევე შევაჯერეთ  – პოლიტპატიმრების გათავისუფლება, ახალი არჩევნები, ახალი საარჩევნო ადმინისტრაცია და საარჩევნო წესები, საარჩევნო სისტემის ცვლილება.

ვადამდელი, დემოკრატიული არჩევნების ჩასატარებლად ოპოზიციამ ივანიშვილის ხელისუფლებას რამდენიმე გონივრული კომპრომისი შესთავაზა, თუმცა მათ რეალური დიალოგის სურვილს კვლავ არაცივილიზებული მეთოდებით ბრძოლა დაუპირისპირეს. როგორც ჩანს, ხელისუფლებას ჰქონდა ილუზია, რომ ამ გზით დემოკრატიულ ოპოზიციურ სპექტრს  აიძულებდა უარი ეთქვა ძირითად მოთხოვნებზე. “ქართული ოცნების” არჩეულმა ამ გზამ სრული კრახი განიცადა”, — ნათქვამია საერთო განცხადებაში.

მათივე თქმით, “ქართულმა ოცნებამ” უნდა გააცნობიეროს, რომ კრიზისიდან ერთადერთი გამოსავალი ვადამდელი, დემოკრატიული არჩევნების ჩატარებაა.

“ჩვენ დღესაც მივმართავთ “ქართულ ოცნებას”  –  დროულად დაუბრუნდეს მოლაპარაკებების მაგიდას და გააცნობიეროს, რომ კრიზისიდან ერთადერთი გამოსავალი ვადამდელი, დემოკრატიული არჩევნების ჩატარება და იმ საკითხების მოგვარებაა, რაც ოპოზიციას და, შესაბამისად, ამომრჩევლების უმრავლესობას აქვს დასმული. ასევე ვაცხადებთ, რომ მუქარა ოპოზიციური პარტიებისთვის საკანონმდებლო დონეზე სადამსჯელო სანქციების შემოღების შესახებ და მანდატების შეჩერების პროცესის გაწელვა არანაირ შედეგს არ გამოიღებს”, — ნათქვამია განცხადებაში.

განცხადებას ხელს აწერენ:

  • ლელო
  • გირჩი – მეტი თავისუფლება (ზურაბ ჯაფარიძე)
  • ევროპული საქართველო
  • სტრატეგია აღმაშენებელი
  • საქართველოს ლეიბორსტული პარტია
  • ბლოკი ძალა ერთობაშია
  • პროგრესი და თავისუფლება
  • ნაციონალური მოძრაობა
  • სახელმწიფო ხალხისთვის
  • რესპუბლიკური პარტია
ნეტგაზეთის მასალების სხვა გამოცემებში გადაბეჭდვის წესი
ავტორი