ნეტგაზეთი | FB-ზე ოპოზიციის ღიად დისკრედიტაციას 37 გვერდი ეწევა, “ოცნებისას” – 32 — ISFED FB-ზე ოპოზიციის ღიად დისკრედიტაციას 37 გვერდი ეწევა, “ოცნებისას” – 32 — ISFED – Netgazeti
RU | GE  

FB-ზე ოპოზიციის ღიად დისკრედიტაციას 37 გვერდი ეწევა, “ოცნებისას” – 32 — ISFED

დღეს, პირველ ოქტომბერს, სამართლიანი არჩევნებისა და დემოკრატიის საერთაშორისო საზოგადოებამ (ISFED) 2020 წლისსაპარლამენტო არჩევნების ჭრილში, სოციალური მედიის წინასაარჩევნო მონიტორინგის პირველი შუალედური ანგარიში წარმოადგინა.

მონიტორინგის ფარგლებში ISFED-მა გამოავლინა:

  • ოპოზიციის ღიად მადისკრედიტირებელი 37 გვერდი;
  • მმართველი პარტიისა და ხელისუფლების ღიად მადისკრედიტირებელი 32 გვერდი;
  • ხელისუფლების სასარგებლოდ მოქმედი ცრუ მედიის 10 გვერდი;
  • ოპოზიციის წინააღმდეგ მიმართული ცრუ მხარდაჭერის 2 გვერდი;
  • ოპოზიციური პარტიების მხარდამჭერი 16 გვერდი;
  • ხელისუფლების მხარდამჭერი 11 გვერდი.

ასევე, მათი დაკვირვების ქვეშ იყო “პატრიოტთა ალიანსის” სასარგებლოდ მოქმედი არაანონიმური 10 გვერდიც. ამ კატეგორიის გვერდებზე ISFED-მა პირველი ივნისიდან 31 აგვისტოს ჩათვლით გამოქვეყნებული 14 290 საჯარო პოსტი გააანალიზა.

“სამართლიანი არჩევნები” აკვირდებოდა  პოლიტიკური პარტიების, მაჟორიტარებისა და პოლიტიკური ლიდერების 452  Facebook გვერდს და ადგილობრივი თვითმმართველობების 127 ოფიციალურ გვერდს.

როგორც ანგარიშშია აღნიშნული, წინასაარჩევნო პერიოდში Facebook-ზე პოლიტიკური პარტიებისა და კანდიდატების გააქტიურება შეიმჩნევა. მათი ნაწილი საარჩევნო კამპანიისთვის იყენებს სოციალური მედიის სხვა პლატფორმებსაც, როგორებიცაა Instagram, Telegram, Viber და TikTok.

ანგარიშში ვკითხულობთ, რომ სახელმწიფო უწყებების ოფიციალურ Facebook გვერდებზე მმართველი პარტიის სასარგებლო ირიბი აგიტაცია შეიმჩნევა.

“კონკრეტულად, საჯარო უწყებების 18-მა გვერდმა გააზიარა პოსტი მთავრობის ანტიკრიზისული გეგმის შესახებ, სადაც ბიძინა ივანიშვილი მოხსენიებულია, როგორც StopCov ფონდის ერთ-ერთი მთავარი კონტრიბუტორი. გარდა ამისა, მუნიციპალიტეტებმა 133 გამოქვეყნებულ პოსტში გამოიყენეს ჰეშთეგი #გაიგერაკეთდება, რაც ეხმიანება „ქართული ოცნების“ მხარდამჭერ Facebook გვერდს „რა კეთდება“, რომელზე გამოქვეყნებული პოსტების ნაწილი დასპონსორებულია, თანხის გადამხდელად კი „ქართული ოცნება“ არის მითითებული”, — ნათქვამია ანგარიშში.

ISFED-ის განმარტებით, დისკრედიტაცია გამოიყენება როგორც ოპოზიციის, ასევე, მმართველი პარტიის წინააღმდეგ, თუმცა,  საერთო ჯამში, ხელისუფლების წინააღმდეგ მოქმედი გვერდები უფრო მეტ პოსტს ავრცელებენ, მაგრამ ოპოზიციის წინააღმდეგ მიმართული პოსტების ჯამური ინტერაქცია (რეაქციების, კომენტარებისა და გაზიარების ჯამი) უფრო მაღალია.

“ოპოზიციის წინააღმდეგ მოქმედ გვერდებზე ორგანიზებულობისა და კოორდინირებულობის ნიშნები მჟღავნდება. მათი ძირითადი სამიზნე “ერთიანი ნაციონალური მოძრაობაა”. ამასთან, ისინი ეწევიან “ევროპული საქართველოსა” და სხვა დანარჩენი ოპოზიციური პარტიების დისკრედიტაციას, გარდა “პატრიოტთა ალიანსისა”.

“ქართული ოცნების” დისკრედიტაციის მიზნით მოქმედ გვერდებზე ორგანიზებული და კოორდკინირებული კამპანია ნაკლებად შეინიშნება. მსგავს გვერდებზე დისკრედიტაციის კამპანია უმეტესად ბიძინა ივანიშვილისა და მმართველი პარტიის წინააღმდეგ მიმდინარეობს, რისთვისაც დაბალი ხარისხის ფოტომონტაჟები გამოიყენება” ,— ნათქვამია ანგარიშში.

ანგარიშის თანახმად, ანონიმური დისკრედიტაციის გვერდების გარდა, დისკრედიტაციას ეწევა ბაკურ სვანიძის მიერ მართული Facebook გვერდების ქსელიც, “რომელიც ღიად გამოხატავს „პატრიოტთა ალიანსის“ მხარდაჭერას”.

ISFED-ის თანახმად, რიგ შემთხვევებში, დისკრედიტაციის მიზნით გამოიყენება სექსისტური და ჰომოფობიური გზავნილებიც.

“სამიზნე ქალი პოლიტიკოსები ხშირად იყვნენ გენდერული ნიშნით თავდასხმის ობიექტები. ამ მხრივ, ოპოზიციონერ ქალ პოლიტიკოსებთან ერთად, თავდასხმის ობიექტები არიან პრეზიდენტი სალომე ზურაბიშვილი და იუსტიციის მინისტრი თეა წულუკიანი”.

საანგარიშო პერიოდისთვის ISFED-მა გამოავლინა 10 ცრუ მედიაგვერდი, რომლებიც პროსახელისუფლებო და ოპოზიციის საწინააღმდეგო გზავნილებს ავრცელებენ.

“დაკვირვების შედეგად აღმოჩნდა, რომ ცრუ მედიაგვერდები საკუთარ პოსტებს ინტენსიურად ასპონსორებენ, თუმცა პოლიტიკური რეკლამის ხარჯების სათანადო დეკლარირებას არ ახდენენ და Facebook-ის რეგულაციებისთვის თავის არიდებას ცდილობენ”, — ვკითხულობთ ანგარიშში.

როგორც ანგარიშშია აღნიშნული, დისკრედიტაციისა და პოლიტიკური სუბიექტების მხარდაჭერის მიზნით, აქტიურად გამოიყენება Facebook ჯგუფებიც. “ჯგუფები, მათში გაერთიანებული მომხმარებლების რაოდენობის გამო, პროპაგანდისა და დეზინფორმაციის სწრაფად გავრცელების მნიშვნელოვანი ინსტრუმენტი შეიძლება აღმოჩნდეს და საინფორმაციო სივრცის დაცვის ახალ გამოწვევას წარმოადგენს”.

ანაგარიშის თანახმად, ღიად დისკრედიტაციული Facebook ჯგუფები ძირითადად მოქმედებენ ორი პოლიტიკური პარტიის, “ქართული ოცნების” და “ერთიანი ნაციონალური მოძრაობის” წინააღმდეგ.

“მხარდამჭერ ჯგუფებს შორის ყველაზე მეტი “ერთიან ნაციონალურ მოძრაობასთან” არის დაკავშირებული. ჯამში, ასეთი 58 საჯარო ჯგუფია აღმოჩენილი, რომელთაც 391,491 წევრი ჰყავთ. “ქართულ ოცნებასთან” კი აფილირებულია 33 ჯგუფი, სულ 369,172 წევრით. “სტრატეგია აღმაშენებელს” 15 მხარდამჭერი ჯგუფი აქვს, რომელთა წევრების რაოდენობაც 20,334-ის ტოლია”, — ნათქვამია ანგარიშში.

ISFED-ის სოციალური მედიის მონიტორინგი ძირითადად მოიცავს სამ მთავარ მიმართულებას:

  • პოლიტიკური პარტიების, მათი ლიდერების, კანდიდატების, ასევე, სხვადასხვა საჯარო ინსტიტუტების თუ მუნიციპალიტეტის ორგანოების სოციალური მედიის ოფიციალური გვერდების მონიტორინგს, ცალკეული საჯარო მოხელეების სოციალურ მედიაში საარჩევნო პერიოდში აქტივობის მონიტორინგს;
  • პოლიტიკური მიზნით მოქმედი ანონიმური გვერდების/ჯგუფების/აქტორების მონიტორინგს, მათ შორის – პოლიტიკური დისკრედიტაციის კამპანიების, ანონიმური და ცრუ მხარდაჭერის, ცრუ მედიის მონიტორინგს;
  • ღირებულებით საკითხებზე საზოგადოების პოლარიზების წამახალისებელი და დეზინფორმაციული გზავნილების გამავრცელებელი გვერდების/ჯგუფების მონიტორინგს.
ნეტგაზეთის მასალების სხვა გამოცემებში გადაბეჭდვის წესი
ავტორი