ნეტგაზეთი | წინა არჩევნების დროს კონკრეტული პირების პასუხისმგებლობის საკითხი დგებოდა — შს ომბუდსმენს პასუხობს წინა არჩევნების დროს კონკრეტული პირების პასუხისმგებლობის საკითხი დგებოდა — შს ომბუდსმენს პასუხობს – Netgazeti
RU | GE  

წინა არჩევნების დროს კონკრეტული პირების პასუხისმგებლობის საკითხი დგებოდა — შს ომბუდსმენს პასუხობს

შინაგან საქმეთა სამინისტრო სახალხო დამცველის განცხადებას პასუხობს. უწყების განმარტებით,  არასწორია  სახალხო დამცველის, ნინო ლომჯარიას 24 სექტემბრის განცხადება იმის თაობზე, რომ წინა წლების პრაქტიკით წინასაარჩევნო პერიოდში ჩადენილი ძალადობრივი ქმედებებისთვის პასუხი პრაქტიკულად არავის უგია.

სამინისტროს განცხადებით, წინა წლებში წინასაარჩევნო პერიოდში უწყება  მყისიერ სამართლებრივ რეაგირებას ახდენდა კომპეტენციას მიკუთვნებულ თითოეულ ინციდენტზე.

“სამინისტრო აქტიურად თანამშრომლობდა ცენტრალურ საარჩევნო კომისიასთან, რათა ყველა შესაძლო ინციდენტი, როგორც უბანზე, ისე მის მიმდებარე ტერიტორიაზე, დროულად ყოფილიყო აღკვეთილი.
გამოძიების ფარგლებში მოპოვებული მტკიცებულებების საფუძველზე, დგებოდა კონკრეტული პირების პასუხისმგებლობის საკითხი, მიუხედავად მათი პოლიტიკური შეხედულებებისა. ბრალდებულთა შორის იყვნენ როგორც ოპოზიციური, ასევე, მმართველი პარტიის წარმომადგენლები და მხარდამჭერები.
მაგალითისთვის 2018 წლის საპრეზიდენტო არჩევნების წინასაარჩევნო პერიოდში, ასევე, პირველი და მეორე ტურების განმავლობაში და შემდგომ პერიოდში, გამოძიება დაიწყო 70-ზე მეტ სისხლის სამართლის საქმეზე, საიდანაც სისხლისსამართლებრივი პასუხისგებლობა დაეკისრა 27 პირს”, — აცხადებენ უწყებაში.
მათივე განცხადებით, შინაგან საქმეთა სამინისტრო, როგორც “პოლიტიკურად ნეიტრალური უწყება”, მოწოდებულია უზრუნველყოს 2020 წლის საპარლამენტო არჩევნების მთელი ქვეყნის მასშტაბით უსაფრთხო და თავისუფალ გარემოში ჩატარება და ამ მიმართულებით გამოთქვამს მზაობას, ითანამშრომლოს ყველა დაინტერესებულ მხარესთან.

სახალხო დამცველი ნინო ლომჯარია წინასაარჩევნო გარემოს გამოწვევებზე საუბრობს.

მისი თქმით, სახალხო დამცველის აპარატი ამ საკითხებთან დაკავშირებით შესაბამის უწყებებსაც მიმართავს და დააკვირდება კონკრეტული ფაქტების გამოძიების პროცესს:

“სამწუხაროდ, უკვე ჰქონდა ადგილი პოლიტიკური ოპონენტების წინააღმდეგ ძალისმიერი ანგარიშსწორების ფაქტებს, ასევე, გვესმის შემთხვევები პირადი ცხოვრების მასალების გამოყენებით პირების დაშინების და შანტაჟის თაობაზე. ამ საკითხებშიც ვართ ჩართული. მივმართავთ შესაბამის უწყებებს და მოვიძიებთ ინფორმაციებს იმის შესახებ, თუ რამდენად სწორად, ობიექტურად და დროულად ხდება ამ დანაშაულების გამოძიება”, – განაცხადა ლომჯარიამ.

მისი განცხადებით, წინა წლების პრაქტიკა აჩვენებს, რომ წინასაარჩევნო პერიოდში ჩადენილი დანაშაულისთვის პასუხისმგებლობა არავის დაკისრებია.

ნეტგაზეთის მასალების სხვა გამოცემებში გადაბეჭდვის წესი
ავტორი