ახალი ამბები

ჩვენ ვიყავით და ახლაც მომხრე ვართ, რუსეთთან ფრენები აღდგეს – აბაშიძე

21 აგვისტო, 2020 • 1321
ჩვენ ვიყავით და ახლაც მომხრე ვართ, რუსეთთან ფრენები აღდგეს – აბაშიძე

რუსეთთან ურთიერთობის საკითხებში საქართველოს პრემიერ-მინისტრის სპეციალური წარმომადგენლის, ზურაბ აბაშიძის თქმით, რუსეთთან ავიამიმოსვლის აღდგენა რუსული მხარის მზაობაზე და ეპიდემიოლოგიურ მდგომარეობაზე იქნება დამოკიდებული.

“საავიაციო მიმოსვლის შეჩერების ინიციატორი არ იყო ქართული მხარე. ეს რუსული მხარის გადაწყვეტილება იყო. ჩვენ ვიყავით და ახლაც ვართ მომხრე იმისა, რომ ფრენები აღდგეს. ასე რომ, თუ რუსეთიდან იქნება შესაბამისი პოლიტიკური ნება და თუ ეპიდემიოლოგიური ვითარება მოგვცემს საშუალებას, შეიძლება ამ მიმართულებით მართლაც იყოს პროგრესი. მეტი კონკრეტულობა ამ ვითარებაში ჯერჯერობით რთულია”, – განუცხადა “ნეტგაზეთს” აბაშიძემ რუსეთის საგარეო საქმეთა მინისტრ სერგეი ლავროვის კომენტარის საპასუხოდ.

რუსეთ-საქართველოს შორის “სრულფასოვანი ურთიერთობების აღდგენაზე” ლავროვმა გაზეთ “Труд”-თან ინტერვიუში ისაუბრა და იმედი გამოთქვა, რომ საქართველოსთან ავიამიმოსვლის აღდგენა უახლოესი მომავლის საკითხია. მან ასევე აღნიშნა, რომ მოსკოვი სრულად უჭერს მხარს “ქართული ოცნების” მიერ 2012 წელს ინიცირებულ ორმხრივი ურთიერთობების ნორმალიზაციის კურსს, თუმცა ქართველ პარტნიორებს ამ საკითხში თანმიმდევრულობა აკლიათ. აბაშიძის აზრით, ლავროვის აღნიშნული კომენტარი დიპლომატიური ურთიერთობების აღდგენის საკითხს ეხებოდა.

“იმ ვითარებაში, როდესაც ოკუპაცია გრძელდება, უხეშად ირღვევა საქართველოს ტერიტორიული მთლიანობის, სუვერენიტეტის პრინციპები, საერთაშორისო სამართალი და გაერო-ს ფუძემდებლური პრინციპები, დიპლომატიური ურთიერთობების აღდგენის საკითხი დღის წესრიგში ვერ დადგება. ყველაზე რთული საკითხების განხილვა უსაფრთხოებასთან დაკავშირებით ხდება ჟენევის საერთაშორისო მოლაპარაკებების ფარგლებში. სამწუხაროდ, იქ სერიოზული წინსვლა ამ წლების განმავლობაში ვერ მოხდა. ჩვენ დაინტერესებული ვართ, რათა ამაღლდეს ჟენევის მოლაპარაკებების შედეგიანობა და ეფექტურობა და ამ თვალსაზრისთ საქართველოს მხარე გააგრძელებს მუშაობს. დიპლომატიური ურთიერთობების აღდგენა კი ამ ვითარებაში იმის ტოლფასი იქნება, რომ ჩვენ შევეგუოთ ე.წ. ახალ რეალობას, რაც გულისხმობს აფხაზეთისა და ცხინვალის რეგიონის ე.წ. დამოუკიდებლობის აღიარებას და რაც ქართული მარისთვის აბსოლუტურად მიუღებელია”, – განაცხადა აბაშიძემ.

კითხვას, – ოკუპირებული რეგიონების აღიარების უკან წაღების გარდა, სხვა წინსვლა საქართველოსა და რუსეთის ურთერთობებში შესაძლოა თუ არა გახდეს დიპლომატიური ურთიერთობების აღიარების წინაპირობა, – აბაშიძე პასუხობს:

“ეს გახლავთ მთავარი საკითხი. რუსეთმა 2008 წელს ცეცხლის შეწყვეტის შეთანმებით აიღო გარკვეული ვალდებულებები, რომელსაც რუსეთის მხარე არ ასრულებს. თუკი რუსეთი შეასრულებს ამ ვალდებულებებს, დაიწყება სერიოზული წინსვლა დეოკუპაციის თვალსაზრისით, მაშინ უკვე დღევანდელისგან ბევრად განსხვავებული ვითარება იქნება”, – აღნიშნა აბაშიძემ.

სრულად ვუჭერთ მხარს 2012 წელს “ოცნების” ინიცირებულ ნორმალიზაციის კურსს – ლავროვი

მასალების გადაბეჭდვის წესი