მართლმსაჯულების სისტემის მთავარი ხარვეზი მისი პოლიტიზება და მმართველი ძალის სამსახურში ყოფნაა – ასეთია ზოგადი სურათი, რომელიც “საერთაშორისო გამჭვირვალობის” საზოგადოებრივი აზრის კვლევიდან გამოიკვეთა. ავტორებმა მოქალაქეებს სასამართლო სისტემაში “კლანის” არსებობაზე, მმართველი პარტიის გავლენებსა და სხვა საკითხებზე ჰკითხეს აზრი.

გამოკითხულთა 47%-ს მიაჩნია, რომ სასამართლო სისტემაში არსებობს გავლენიანი ჯგუფი(“კლანი”), მათგან 84% კი ფიქრობს, რომ აღნიშნულ ჯგუფს ხელისუფლების წარმომადგენლები უჭერენ მხარს. გამოკითხულთაგან, რომელთაც სისტემაში “კლანის” არსებობის სჯერათ, 88% ამბობს, რომ მასში შემავალმა ადამიანებმა სასამართლო უნდა დატოვონ.

ორგანიზაციის წარმომადგენლებმა მოქალაქეებს სასამართლო სისტემის დახასიათებაც სთხოვეს რიგი კრიტერიუმების მიხედვით. გამოკითხულთა 45%-ს მიაჩნია, რომ აღნიშნული სისტემა მმართველი პარტიის გავლენის ქვეშაა, 23% “ქართული ოცნების” ნაწილობრივ გავლენაზე საუბრობს, 15% კი საერთოდ არ იზიარებს ამ მოსაზრებას. 40% მიიჩნევს, რომ სასამართლოზე მოსამართლეთა გავლენიანი ჯგუფის კონტროლი ვრცელდება, ასევე 40% კი ფიქრობს, რომ სისტემა მიკერძოებულია. გამოკითხულთაგან მხოლოდ 20% მიიჩნევს სისტემას სრულად სამართლიანად, 36% კი საპირისპიროს ფიქრობს.

“საერთაშორისო გამჭვირვალობა” ასევე დაინტერესდა ადამიანების აზრით, არის თუ არა გავრცელებული საქართველოში პოლიტიკური ნიშნით დაპატიმრების პრაქტიკა. შედეგების თანახმად, გამოკითხულთა ყველაზე მეტი, 48% თვლის, რომ საქართველოში გავრცელებულია აღნიშნული პრაქტიკა, 38%-ს კი მიაჩნია, რომ ამგვარი დაპატიმრება არ არის გავრცელებული.

კითხვაზე, ემსახურება თუ არა მმართველი პარტიის ინტერესებს პროკურატურა, შინაგან საქმეთა სამინისტრო ან სახელმწიფო უსაფრთხოების სამსახური, შედეგები ასე ნაწილდება:

საზოგადოებრივი აზრის კვლევა „საერთაშორისო გამჭვირვალობა – საქართველოს“ დაკვეთით „კავკასიის კვლევითი რესურსების ცენტრმა“ (CRRC) 2020 წლის 27 თებერვლიდან 18 მარტამდე პერიოდში ჩაატარა. კვლევის ფარგლებში მთელი ქვეყნის მასშტაბით 1763 ადამიანი გამოიკითხა. კვლევის საშუალო ცდომილება 2.2%-ია.