ნეტგაზეთი | რუსეთის ნაკრებში არ ვიმუშავებდი — შოთა არველაძე რუსეთის ნაკრებში არ ვიმუშავებდი — შოთა არველაძე – Netgazeti

რუსეთის ნაკრებში არ ვიმუშავებდი — შოთა არველაძე

ყოფილი ფეხბურთელისა და ამჟამად მწვრთნელის, შოთა არველაძის თქმით, რუსეთის ნაკრებში მუშაობას ახლაც, 2010 წლის მსგავსად, არ დათანმხდებოდა. ამის შესახებ მან sports.ru-სთან ინტერვიუში განაცხადა.

2010 წელს დიკ ადვოკატმა [რუსეთის ეროვნული ნაკრების მაშინდელმა მწვრთნელმა] ასისტენტად მიგიწვიათ. თქვენ უპასუხეთ: „ჯერ არ შემიძლია — ჩვენმა ქვეყნებმა ერთმანეთს ძალიან დიდი ტკივილი მიაყენეს“. ახლა წახვიდოდით? — ჰკითხეს არველაძეს.

„ახლაც არა. ჩვენი ტერიტორიები არავის დაუბრუნებია. 2008-ში ჩემი ოჯახი თბილისში იყო, ბავშვები — ბათუმში. მახსოვს, როგორი საშიში იყო. ასეთი რამის დავიწყება რთულია. კლუბში მუშაობა ერთია, ნაკრებში — საერთოდ სხვა რამეა. არ მინდა პოლიტიკასთან ავრიო ჩემი გრძნობები თქვენი კულტურისდამი და ქვეყნისადმი, მაგრამ ეს სულ გიშლის ხელს სწორი არჩევანის გაკეთებაში.

მსოფლიოს ჩემპიონატზე [2018 წლის მსოფლიო ჩემპიონატი ფეხბურთში, რომელიც რუსეთში ჩატარდა] ვერ მოვახერხე ჩამოსვლა. თქვენ არ გჭირდებათ ვიზა საქართველოში [ჩამოსასვლელად], ჩვენ რუსეთში კი გვჭირდება. უნდა შემეგროვებინა უამრავი დოკუმენტი, მერბინა საელჩოებში — ამას ბევრი დრო მიაქვს. ვიცი, რომ ბილეთის ყიდვისას შეიძლება, ვიზა არ გააფორმო, მაგრამ ისე გვინდოდა ჩამოსვლა.

2002 წლიდან არ ვყოფილვარ მოსკოვში. მხოლოდ თებერვალში მოვხვდი: ვთამაშობდით ამხანაგურ თამაშს „სპარტაკთან“. ყველაფერი სუპერი იყო: მოსკოვიც და ამინდიც. საწყენია, რომ წავაგეთ. კარგი იყო დაბრუნება 18 წლის შემდეგ და დაბადების დღის აღნიშვნა“, — უპასუხა მან.


შოთა არველაძე ფეხბურთელი 1990-2008 წლებში იყო. თამაშობდა როგორც ქართულ, ასევე ევროპულ კლუბებში — მათ შორის ამსტერდამის „აიაქსში“, გლაზგოს „რეინჯერსსა“ და „ლევანტეში“. მონაწილეობა მიიღო 450 შეხვედრაში, გაიტანა 251 გოლი.

2008-10 წლებში იყო ცნობილი ჰოლანდიელი მწვრთნელის, ლუი ვან გალის ასისტენტი. შემდეგ დამოუკიდებელი სამწვრთნელო კარიერა დაიწყო, მუშაობდა თურქეთისა და ისრაელის კლუბებში. ამჟამად არის უზბეკური კლუბის, ტაშკენტის „პაკტაჰორის“ მთავარი მწვრთნელი.

ნეტგაზეთის მასალების სხვა გამოცემებში გადაბეჭდვის წესი
ავტორი
ნიკა ბურდული – ნეტგაზეთის რეპორტიორი 2019 წლის დეკემბრიდან. E-mail: burrrduli@gmail.com