გასული 40 დღის განმავლობაში Covid-19-თან დაკავშირებით სოციალურ მედიაში გამოქვეყნებული პოსტების გამო თურქეთში 402 ადამიანი დააკავეს. ამის შესახებ AP იუწყება.

ოფიციალური პირების თანახმად, შინაგან საქმეთა სამინისტროს თანამშრომლებმა დაკავებულთა პოსტები “ყალბად და პროვოკაციულად” მიიჩნიეს. ჯამში, შინაგან საქმეთა სამინისტრომ 6 000 ანგარიში შეამოწმა, დაკავებული 402 პირი კი იმ 855 ადამიანს შორის იყო, რომლებიც ზემოაღნიშნულ ანგარიშებს მართავდნენ.

სამინისტროს ოფიციალურმა პირმა AP-ს უთხრა, რომ დაკავებულებს ედავებიან “პანიკის გამოწვევას” ახალი კორონავირუსის პანდემიასთან დაკავშირებით, რომელიც, სხვა გზავნილებთან ერთად, მოიცავს ბრალდებებს მთავრობის მიმართ, რომ ის ვერ აკონტროლებს კრიზისს, ასევე, “ტყუილს” გარდაცვლილთა და დაინფიცირებულთა რიცხვის შესახებ.

ქვეყანაში ახალ კორონავირუსით ინფიცირებულთა რიცხვმა 110 130-ს მიაღწია. გარდაცვლილია 2 805 ადამიანი. ვირუსის გავრცელების მაჩვენებლით თურქეთი მეშვიდე ადგილს იკავებს მსოფლიოს ქვეყნებს შორის. 30 აპრილიდან 31 დიდ ქალაქში 3 დღით სრული კარანტინი გამოცხადდა.

ამასთან, საგარეო საქმეთა სამინისტროს თანახმად, კრიზისის დაწყებიდან დღემდე, თურქეთში 40 000 მოქალაქე დააბრუნეს 75 ქვეყნიდან. რამდენიმე დღის წინ ანკარამ Covid-19-ით ინფიცირებული მოქალაქე შვედეთიდან გადმოიყვანა. სახელმწიფო სააგენტო “ანადოლუ” წერს, რომ დახმარება სოციალური მედიის საშუალებით მისმა შვილმა ითხოვა და თქვა, რომ შვედეთში მამამისი სამედიცინო დახმარებას ვერ იღებდა. შვედეთის მთავრობაში საკითხთან დაკავშირებით კომენტარი ჯერ არ გაუხმიანებიათ.