ნეტგაზეთი | “კატეგორიულად მიუღებელია ეს ტონი” – კალაძე კონგრესმენებზე “კატეგორიულად მიუღებელია ეს ტონი” – კალაძე კონგრესმენებზე – Netgazeti
RU | GE  

“კატეგორიულად მიუღებელია ეს ტონი” – კალაძე კონგრესმენებზე

“კატეგორიულად მიუღებელია ეს ტონი და კატეგორიულად მიუღებელია ამ ტიპის განცხადებები”, – ეს განცხადება კახა კალაძემ გუშინ გააკეთა კონგრესმენის მიერ გაკეთებულ განცხადებასთან დაკავშირებით. კალაძის კომენტარს რ2 ავრცელებს.

კონგრესმენმა, წარმომადგენელთა პალატის წევრმა პიტ ოლსონმა კონგრესში სიტყვით გამოსვლისას “ქართული ოცნების” ლიდერს პუტინის მარიონეტი უწოდა და სხვა კონგრესმენებს მოუწოდა, მხარი დაუჭირონ საქართველოში საპროტესტო მოძრაობას.

კალაძის თქმით, საქმე ეხება კომპანია ფრონტერას ლობიზმს. ამ კომპანიასთან საქართველოს მთავრობას დავა აქვს საარბიტრაჟო სასამართლოში.

“სტრატეგიული პარტნიორის კანონმდებლები ასე არ უნდა ესაუბრებოდნენ მეგობარ ქვეყანას, მით უმეტეს, როდესაც საქმე ეხება ერთ საეჭვო რეპუტაციის მქონე კომპანიას… “ფრონტერას”, – განაცხადა კალაძემ და დასძინა, რომ ფრონტერა დავას აუცილებლად წააგებს.

“კატეგორიულად მიუღებელია ეს ტონი და კატეგორიულად მიუღებელია ამ ტიპის განცხადებები”, – განაცხადა კალაძემ.

“მე მაქვს კითხვა: რა საერთო აქვთ “სეზამის ქუჩის” პერსონაჟ Oscar The Grouch-ს (“უხასიათო ოსკარი”) და ქართველ ოლიგარქ ბიძინა ივანიშვილს? რა აქვთ მათ საერთო? ორივე მათგანი არის მარიონეტი, რომელიც სახლს ანაგვიანებს. ვლადიმერ პუტინის მარიონეტი თავს დაესხა ამერიკელ ინვესტორს საქართველოში და ასევე შეუტია ადამიანის ძირითად უფლებებს”, – აღნიშნა პიტ ოპლსონმა.

კონგრესმენმა ისაუბრა ამერიკულ ნავთობკომპანია “ფორნტერაზე”, რომელიც საქართველოში ნავთობს 1990-იანი წლებიდან მოიპოვებს და ბოლო პერიოდში მნიშვნელოვანი პრობლემები შეექმნა. კომპანიამ გაათავისუფლა საქართველოში დასაქმებული პირები, რომლებიც მისგან თითქმის ერთწლიანი სახელფასო დავალიანების ანაზღაურებას ითხოვენ.

კონგრესმენ ოლსონის თქმით, აღნიშნული კომპანია წლების განმავლონაში წარმატებით ქმნიდა სამუშაო ადგილებს.

“ეს ხდებოდა მანამ, სანამ საქართველოს ხელისუფლებამ არ ჩაიგდო ყველა ოპერაცია და არ დაეუფლა მათ ტექნიკას. რა თქმა უნდა, ვლადიმერ პუტინი ბედნიერია, რომ გააკონტროლებს საქართველოს ნავთობს. გამოღვიძების დროა, ქართველ ხალხს სჭირდება ჩვენი დახმარება, შემომიერთდით და ხმა ავიმაღლოთ საქართველოში თავისუფლებისთვის”, – პიტ ოლსონმა მოუწოდა კონგრესმენებს.

მან თავისი გამოსვლის ვიდეო ტვიტერზე შემდეგი ტექსტით დააშეარა: “დღეს წარმომადგენელთა პალატაში ვისაუბრე ქართველი ხალხის მხარდასაჭერად, რომლებიც ითხოვენ საქართველოში კორუმპირებული მთავრობისა და რუსეთის გავლენის დასრულებას.

რაც შეეხება Oscar The Grouch-ს (“უხასიათო ოსკარი”), ეს არის ამერიკული სატელევიზიო შოუს, “სეზამის ქუჩის” პოპულარული პერსონაჟი, რომელიც ნაგვის ურნაში ცხოვრობს და უსარგებლო ნივთების, ნაგვის შეგროვებითაა დაკავებული.

ნეტგაზეთის მასალების სხვა გამოცემებში გადაბეჭდვის წესი
ავტორი
დათო ქოქოშვილი არის ნეტგაზეთის რედაქტორი 2018 წლის 1 თებერვლიდან. მანამდე ის იყო ნეტგაზეთის რეპორტიორი 2013 წლიდან. Email: davit.qoqoshvili@gmail.com