ახალი ამბები

ხილი და ყურძენი – 31.9%, ხორცი – 14.8 % – 2019 წლის ინფლაცია

3 იანვარი, 2020 • 1271
ხილი და ყურძენი – 31.9%, ხორცი – 14.8 % – 2019 წლის ინფლაცია

სტატისტიკის ეროვნული სამსახურის ცნობით, 2019 წლის დეკემბერში თვიურმა ინფლაციამ  წინა თვესთან შედარებით 0,4% შეადგინა, წლიური ინფლაცია კი 7%-ით განისაზღვრა, რაც 2018 წლის წლიურ ინფლაციაზე 5,5%-ით მეტია.

ილუსტრაცია: საქსტატი

 

თვიური ინფლაცია

საქსტატის ცნობით, ყოველთვიურ ინფლაციაზე გავლენა იქონია ფასების ცვლილებამ შემდეგ ჯგუფებზე: 

სურსათი და უალკოჰოლო სასმელები: ჯგუფში დაფიქსირდა ფასების 1.4 -პროცენტიანი მატება. შესაბამისად, ჯგუფის წვლილმა თვის ინდექსში 0.44 პროცენტული პუნქტი შეადგინა. ფასები გაიზარდა შემდეგ ქვეჯგუფებზე: ბოსტნეული და ბაღჩეული (3.7 პროცენტი), ხილი და ყურძენი (2.9 პროცენტი); ხორცი და ხორცის პროდუქტები (2.3 პროცენტი), თევზეული (2.1 პროცენტი), ასევე- რძე, ყველი და კვერცხი (1.1 პროცენტი). ამასთან, ფასები შემცირდა შაქარზე, ჯემსა და სხვა ტკბილეულზე (-1.0 პროცენტი); 

საცხოვრებელი, წყალი, ელ.ენერგია, აირი: ჯგუფში ფასები მომატებულია 1.0 პროცენტით, რაც 0.09 პროცენტული პუნქტით აისახა მთლიან ინდექსზე. ფასები გაიზარდა საცხოვრებლის მიმდინარე მოვლასა და შეკეთებაზე (2.0 პროცენტი) და ელექტროენერგიის, აირისა და სათბობის სხვა სახეების ქვეჯგუფზე (0.9 პროცენტი); 

ტრანსპორტი: ჯგუფში დაფიქსირდა ფასების 0.7- პროცენტიანი კლება. აღნიშნული ცვლილება -0.09 პროცენტული პუნქტით აისახა ინფლაციის მთლიან მაჩვენებელზე. ფასები შემცირდა სატრანსპორტო საშუალებების შეძენაზე (-2.4 პროცენტი) და სატრანსპორტო მომსახურებაზე (-2.1 პროცენტი).

ილუსტრაცია: საქსტატი

წლიური ინფლაცია

წლიური ინფლაციის ფორმირებაზე ძირითადი გავლენა იქონია ფასების ცვლილებამ შემდეგ ჯგუფებზე: 

სურსათი და უალკოჰოლო სასმელები: ჯგუფში ფასები გაიზარდა 12.3 პროცენტით, რაც წლიურ ინფლაციაზე 3.78 პროცენტული პუნქტით აისახა. ფასები მომატებულია შემდეგ ქვეჯგუფებზე: ხილი და ყურძენი (31.9 პროცენტი), ხორცი და ხორცის პროდუქტები (14.8 პროცენტი), თევზეული (14.2 პროცენტი), ბოსტნეული და ბაღჩეული (14.1 პროცენტი), რძე, ყველი და კვერცხი (13.5 პროცენტი), შაქარი, ჯემი და სხვა ტკბილეული (10.7 პროცენტი), მინერალური და წყაროს წყალი, უალკოჰოლო სასმელები და ნატურალური წვენები (9.1 პროცენტი), პური და პურპროდუქტები (6.6 პროცენტი), ყავა, ჩაი და კაკაო (5.0 პროცენტი), ასევე, ზეთი და ცხიმი (4.6 პროცენტი); 

ალკოჰოლური სასმელები, თამბაქო: ფასები გაიზარდა 15.6 პროცენტით, რაც 1.03 პროცენტული პუნქტით აისახა წლიური ინფლაციის მთლიან მაჩვენებელზე. ფასები მომატებულია როგორც თამბაქოს ნაწარმზე (30.8 პროცენტი), ასევე, ალკოჰოლურ სასმელებზე (3.1 პროცენტი); 

დასვენება, გართობა და კულტურა: ფასები გაზრდილია 6.9 პროცენტით, შესაბამისად, ჯგუფის წვლილმა წლიურ ინდექსში 0.4 პროცენტული პუნქტი შეადგინა. ფასები გაიზარდა ტურისტულ მოგზაურობაზე (13.6 პროცენტი), დასვენების, გართობისა და კულტურის ხანგრძლივი მოხმარების სხვა საქონელზე (7.4 პროცენტი), ასევე, გასართობ და კულტურულ მომსახურებაზე (1.8 პროცენტი); 

ტრანსპორტი: ჯგუფში დაფიქსირდა ფასების 2.9 -პროცენტიანი მატება, რაც 0.35 პროცენტული პუნქტით აისახა ინფლაციის მთლიან მაჩვენებელზე. ჯგუფში ფასები გაიზარდა სატრანსპორტო საშუალებების შეძენაზე (4.6 პროცენტი), პირადი სატრანსპორტო საშუალებების ექსპლუატაციაზე (3.5 პროცენტი) და სატრანსპორტო მომსახურებაზე (1.2 პროცენტი); 

სასტუმროები, კაფეები და რესტორნები: ფასები მომატებულია 7.9 პროცენტით, რაც 0.34 პროცენტული პუნქტით აისახა მთლიანი ინდექსის ზრდაში. ფასები გაიზარდა საზოგადოებრივ კვებაზე (9.0 პროცენტი).

 

მასალების გადაბეჭდვის წესი