ნეტგაზეთი | უგულავას ცნობით, პროკურატურა მისთვის პასპორტის ჩამორთმევას ითხოვს უგულავას ცნობით, პროკურატურა მისთვის პასპორტის ჩამორთმევას ითხოვს – Netgazeti
RU | GE  

უგულავას ცნობით, პროკურატურა მისთვის პასპორტის ჩამორთმევას ითხოვს

გიგი უგულავას ცნობით, აეროპორტში მომხდარი ინციდენტის საქმეზე, რომლის ფარგლებშიც ბრალი თავად პოლიტიკოსს წაუყენეს, პროკურატურა აღკვეთის ღონისძიებად 5 000 ლარის გირაოს შეფარდებას და პასპორტის ჩამორთმევას ითხოვს.

პროკურატურის შუამდგომლობას უგულავა თავად ავრცელებს:

გიგი უგულავასთვის აღკვეთის ღოისძიების საკითხზე თბილისის საქალაქო სასამართლომ დღეს უნდა იმსჯელოს. ამ საქმეზე ბრალდებულია კიდევ ერთი პირი, რომელიც აეროპორტში მომხდარი ინციდენტის მეორე დაპირისპირებული მხარიდანაა. ამავე საქმეზე დაზარალებულადაა ცნობილი გოკა გაბაშვილი.

გიგი უგულავამ და გოკა გაბაშვილმა გუშინ დილით განაცხადეს, რომ უცნობი პირები მათ თბილისის საერთაშორისო აეროპორტში თავს დაესხნენ და ფიზიკური შეურაცხყოფა მიაყენეს. შსს-მ კი გამოძიება 126-ე მუხლით დაიწყო.

სისხლის სამართლის კოდექსის 126-ე მუხლი ეხება ძალადობას, პირველი ნაწილი კი გულისხმობს ცემას ან სხვაგვარ ძალადობას, რამაც დაზარალებულის ფიზიკური ტკივილი გამოიწვია, მაგრამ არ მოჰყოლია ამ კოდექსის 120-ე მუხლით გათვალისწინებული შედეგი. დანაშაული ისჯება ჯარიმით ან საზოგადოებისათვის სასარგებლო შრომით ვადით ას ოციდან ას ოთხმოც საათამდე ან შინაპატიმრობით ვადით ექვსი თვიდან ერთ წლამდე ანდა თავისუფლების აღკვეთით ვადით ერთ წლამდე, იარაღთან დაკავშირებული უფლებების შეზღუდვით ან უამისოდ.

ნეტგაზეთის მასალების სხვა გამოცემებში გადაბეჭდვის წესი
ავტორი
მარიამ ბოგვერაძე არის "ნეტგაზეთის" რეპორტიორი 2016 წლიდან.