წითელ მოედანზე ათასობით ჯარისკაცმა გაიარა, წარმოდგენილი იყო ახალი სამხედრო ტექნიკა. სამხედრო აღლუმს ბევრი მაღალი რანგის სტუმარი დაესწრო, მათ შორის იყვნენ გაეროს გენერალური მდივანი ბან კი–მუნი და ჩინეთის პრეზიდენტი სი ძინ პინი. დასავლეთის ქვეყნების ლიდერთა უმრავლესობა აღლუმს უკრაინის კონფლიქტში რუსეთის როლის გამო არ დაესწრო.

BBC-ის ცნობით, სტუმართა შორის ასევე იყვნენ ინდოეთის, ეგვიპტის, სამხრეთ აფრიკის რესპუბლიკის, ცენტრალური აზიის ლიდერები, კუბისა და ვენესუელას პრეზიდენტები.

ვლადიმერ პუტინმა სიტყვით გამოსვლისას პატივი მიაგო მეორე მსოფლიო ომის დროს დაღუპული საბჭოთა ჯარისკაცების ხსოვნას. გარდა ამისა, მან მადლობა გადაუხადა დიდ ბრიტანეთს, საფრანგეთსა და ამერიკას გამარჯვებაში მათ მიერ შეტანილი წვლილისთვის.

ვლადიმერ პუტინს ფაშიზმზე გამარჯვების დღე არ მიულოცავს უკრაინისა და საქართველოს პრეზიდენტებისთვის. თუმცა, მან მიულოცა აფხაზეთისა და სამხრეთ ოსეთის დე ფაქტო ლიდერებს.