საკუთარი აღჭურვილობა აქვთ და არა ცეცხლსასროლი იარაღი – სირაძე პარლამენტში მყოფ პოლიციაზე

საპატრულო პოლიციის დეპარტამენტის უფროსი ვაჟა სირაძე ამბობს, რომ პარლამენტის შენობაში არიან შსს-ს განსაკუთრებულ დავალებათა დეპარტამენტის წარმომადგენლები, რომელთაც აქვთ საკუთარი აღჭურვილობა, თუმცა არ აქვთ ცეცხლსასროლი იარაღი. ასე უპასუხა სირაძემ “მთავარი არხის” ჟურნალისტის კითხვას, რომელიც პარლამენტში იარაღის შეტანას ეხებოდა.

“თქვენ საუბრობთ ალბათ განსაკუთრებულ დავალებათა დეპარტამენტის ძალებზე. ისინი არიან შინაგან საქმეთა სამინისტროს წარმომადგენლები. ისინი აქ არიან მხოლოდ და მხოლოდ საზოგადოებრივი წესრიგისა და უსაფრთხოების დასაცავად. განსაკუთრებულ დავალებათა დეპარტამენტს საკუთარი აღჭურვილობა აქვს და არანაირი ცეცხლსასროლი იარაღი ადგილზე არავის აქვს”,-აცხადებს სირაძე.

“მთავარი არხის” ინფორმაციით, პარლამენტის შენობაში იარაღი შეიტანეს. არხის ინფორმაციითვე, შსს-ს თანამშრომლებს იარაღი შენობის დერეფნებში აქვთ მიტანილი.

ნეტგაზეთის მასალების სხვა გამოცემებში გადაბეჭდვის წესი
ავტორი
მარიამ ვარადაშვილი არის ნეტგაზეთის რეპორტიორი 2017 წლის სექტემბრიდან.