“სიბირზე” ფრენის ნებართვა არ გაცემულა – სამოქალაქო ავიაციის სააგენტო

სამოქალაქო ავიაციის სააგენტოს ხელმძვანელის, ლევან კარანაძის თქმით, რუსეთის ავიაციის ფედერალური სააგენტოს (როსავიაცია) მიერ “სიბირის” ავიახაზებზე გაცემული დოკუმენტაცია ფრენების ნებართვას არ ნიშნავს.

საუბარია როსავიაციის ვებ-გვერდზე გამოქვეყნებულ დოკუმენტზე, რომლის თანახმადაც, ავიაკომპანიამ მოსკოვი-ქუთაისის მიმართულებით ფრენებზე დაშვება მოიპოვა.

“ეს ინფორმაცია გავრცელდა და ჩვენც გადავამოწმეთ.. ალბათ, უნდა დავაზუსტოთ, რომ ეს არ იყო ფრენების ნებართვა ამ კონკრეტულ კომპანიაზე. როგორც ჩანს, რუსეთის საავიაციო ხელისუფლებამ ე.წ დანიშვნის პროცესი დაიწყო. ნაცვლად ავიაკომპანია “გლობუსისა”, სიბირის ავიახაზები დაინიშნა. ეს პოზიტიური სიგნალია, თუმცა ფრენების აღდგენას არ ნიშნავს”,- ამბობს კარანაძე.

რუსულმა სააგენტო Lenta.ru-მ გაავრცელა ინფორმაცია, რომ რუსეთ-საქართველოს მიმართულებით ავიამიმოსვლა აღდგა. როგორც გამოცემა წერდა, ავიაკომპანია “სიბირმა” მოსკოვი-ქუთაისის მიმართულებით ფრენების უფლება მოიპოვა.

საქართველოში 20 ივნისს დაიწყო ანტისაოკუპაციო აქციები, სადაც საქართველოს ხელისუფლების არაერთი წარმომადგენლის გადაყენება მოითხოვეს. რუსეთის ხელისუფლებამ აღნიშნული “რუსოფობიურ პროვოკაციად” შეაფასა და “უსაფრთხოების” საბაბით საქართველოსთან 8 ივლისიდან ავიამიმოსვლა აუკრძალა როგორც რუსულ, ისე ქართულ ავიაკომპანიებს. გარდა ამისა, რუს ტურისტებს მოუწოდეს, თავი შეიკავონ საქართველოში მოგზაურობისგან და დროულად დატოვონ ქვეყანა.

ბოლო პერიოდში რუსეთის ხელისუფლების წარმომადგენლების მხრიდან ფრენების შესაძლო აღდგენაზე არაერთი მინიშნება გაკეთდა, თუმცა კრემლში შესაბამისი გადაწყვეტილება ჯერ არ მიუღიათ.

ნეტგაზეთის მასალების სხვა გამოცემებში გადაბეჭდვის წესი
ავტორი
მარიამ ვარადაშვილი არის ნეტგაზეთის რეპორტიორი 2017 წლის სექტემბრიდან.