ვლადიმერ პუტინის პრესსპიკერის დმიტრი პესკოვის განცხადებით, რუსეთის პრეზიდენტი ვლადიმერ პუტინი, გერმანიის კანცლერი ანგელა მერკელი და საფრანგეთის პრეზიდენტი ფრანსუა ოლანდი შეთანხმდნენ, რომ 9 თებერვალს მომზადდეს ერთობლივი დოკუმენტი. მოლაპარაკებებში და დოკუმენტის შემუშავებაში უკრაინის პრეზიდენტი პეტრო პოროშენკოც ჩაერთვება. მისი მონაწილეობა სატელეფონო ჩართვით იქნება უზრუნველყოფილი.
პესკოვის თქმით, მერკელი და ოლანდი აეროპორტში უკვე გაემგზავრნენ, მათ მედიისთვის კომენტარი კრემლში არ გაუკეთებიათ.
საფრანგეთის პრეზიდენტი ფრანსუა ოლანდი და გერმანიის კანცლერი ანგელა მერკელი აღმოსავლეთ უკრაინაში საომარი მოქმედებების შეწყვეტის მიღწევის მიზნით მოსკოვში დღეს ჩაფრინდნენ.
ვლადიმერ პუტინთან დაგეგმილ შეხვედრას წინ უძღვოდა მოლაპარაკებები კიევში. 5 თებერვალს გერმანიისა და საფრანგეთის ლიდერებმა კონფლიქტის მოგვარების ახალი გეგმა უკრაინის პრეზიდენტ პეტრო პოროშენკოსთან ერთად დეტალურად განიხილეს.
BBC-ის ინფორმაციით, მოსკოვის შეხვედრაზე ორი ლიდერი წარმოადგენს კონფლიქტის გადაწყვეტის ახალ გეგმას, რომელიც დაფუძნებულია “ტერიტორიულ მთლიანობაზე” და შესაძლოა ყველასთვის მისაღები აღმოჩნდეს.
შეხვედრის შემდეგ პოროშენკომ განაცხადა, რომ მას “ცეცხლის შეწყვეტის იმედი მიეცა”, წერს BBC.
რუსეთი უარყობს, რომ იარაღით ამარაგებს პრორუსულ ძალებს. მოსკოვი ასევე უარყოფს უკრაინისა და დასავლეთის ბრალდებას, რომ მისი შეიარეღებული ძალები ამბოხებულებთან ერთად იბრძვიან უკრაინის სამხედრო ძალების წინააღმდეგ დონეცკისა და ლუგანსკის რეგიონებში.
BBC გაეროს ინფორმაციაზე დაყრდნობით წერს, რომ აპრილის შემდეგ, აღმოსავლეთ უკრაინაში შეტაკებების შედეგად, თითქმის 5400 ადამიანი დაიღუპა.
ცეცხლის შეწყვეტის შესახებ შეთანხმებას, რომელსაც სექტემბერში მინსკში მოეწერა ხელი, არავინ იცავს.
