ქუთაისის საკრებულოს დეპუტატი ქართული ოცნებიდან, ალექსანდრე (ალეკო) ახალაძე 20-21 ივნისის აქციის ძალის გამოყენებით დაშლისთვის გიორგი გახარიას გმირს უწოდებს, ხოლო რუსთაველის გამზირზე შეკრებილ დაშავებულ დემონსტრანტებს ჰომოფობიურ კონტექსტში მოიხსენიებს, რასაც ნეტგაზეთი ემიჯნება.

ჟესტი – ხელით დაფარული თვალი – მუდამ გაგვახსენებს ტკივილს, …ცისფერებსა და დამნაშავე პარტიებს! ასევე – გახარიას და პოლიციელთა გმირობას ! ” – წერს სოციალურ ქსელში ალექსანდრე ახალაძე.

ალექსანდრე ახალაძე მიიჩნევს, რომ შს მინისტრის გადადგომით მომავალი შტურმები და არეულობები წახალისდება, რაც, უმრავლესობის დეპუტატის მოსაზრებით, “ყველაზე მეტად დამნაშავე პარტიებს” აწყობთ.

ინფორმაცია თავდაპირველად ქუთაისიპოსტმა გაავრცელა.

ქუთაისის საკრებულოს დეპუტატი ჯერ ამ პოსტებზე დაწერილ კრიტიკულ კომენტარებს უშლიდა ფეისბუკის მომხმარებლებს, ხოლო შემდეგ თავისივე საჯარო განცხადებები სოციალური ქსელიდან საერთოდ წაშალა ან ხელმიუწვდომელი გახადა.

• თუმცა ნეტგაზეთს მისი ორივე პოსტის ე.წ. სქრინი აქვს შემონახული:

ალექსანდრე ახალაძის ფეისბუკის ანგარიშის ავთენტურობა ნეტგაზეთს ქუთაისის საკრებულოში დაუდასტურეს.

რა მოხდა

19-20 ივნისს საქართველოში დაგეგმილი იყო მართლმადიდებლობის საპარლამენტთაშორისო გენერალური ასამბლეის სესია. ასამბლეის პრეზიდენტი რუსეთის დუმის დეპუტატი სერგეი გავრილოვია, რომელიც აღნიშნულ სესიას 20 ივნისს საქართველოს პარლამენტის თავმჯდომარის სავარძლიდან რუსულ ენაზე გაუძღვა. “ევროპული საქართველოსა” და “ნაციონალური მოძრაობის” პროტესტის შედეგად ღონისძიება ჩაიშალა და რუსეთის დელეგაცია იძულებული გახდა, დაეტოვებინა საქართველო.

20 ივნიის თბილისში გავრილოვის საქართველოში მოწვევასთან დაკავშირებით საქართველოს ხელისუფლების წინააღმდეგ დაიწყო მასშტაბური საპროტესტო აქციები. აქციაზე მოითხოვეს შინაგან საქმეთა მინისტრ გიორგი გახარიას, პარლამენტის თავმჯდომარის ირაკლი კობახიძის და სახელმწიფო უსაფრთხოების სამსახურის უფროსი ვახტანგ გომელაურის გადადგომა, ასევე საპარლამენტო არჩევნების ჩატარება 2020 წელს პროპორციული სისტემით.

ოპოზიციის ლიდერების ნაწილმა აქციის მონაწილეებს პარლამენტის შენობაში შესვლისა და მისი დაკავებისკენ მოუწოდა. ხელისუფლებამ რამდენიმე საათში ძალის გამოყენებით დაარბია საპროტესტო აქცია. შედეგად დაშავდა 240-დე ადამიანი, მათ შორის, 80-მდე სამართალდამცავი. აქციაზე დაშავებულმა რამდენიმე ადამიანმა დაკარგა თვალი. არაერთი ადამიანის მდგომარეობა მძიმეა. ძირითადად პოლიციის მხრიდან ნასროლი რეზინის ტყვიებით დაშავდა მედიის 30-ზე მეტი წარმომადგენელი. ვიდეოკადრებში ჩანს, პოლიციელთა ნაწილი მიზანმიმართულად როგორ ესვრის რეზინის ტყვიებს მოქალაქეებს. სულ დააკავეს 300-ზე მეტი ადამიანი. ომბუდსმენის ცნობით, დაკავებულები ვერ სარგებლობენ სამართლიანი სასამართლოს უფლებით.

დარბევის შემდეგ გადადგა პარლამენტის თავმჯდომარე ირაკლი კობახიძე, ზაქარია ქუცნაშვილმა კი თქვა, რომ ტოვებს დეპუტატის მანდატს. აქციის მონაწილეებს ეს საკმარისად არ მიაჩნიათ და პროტესტს აგრძელებენ გახარიას გადადგომის მოთხოვნით, რისი მთავარი მიზეზიც აქციის დარბევაა. პროტესტის დაწყებიდან შემდეგ, “ოცნებაში“ მიიღეს გადაწყვეტილება, რომ 2020 წელს არჩევნები პროპორციული სისტემით ჩატარდეს.