დუშეთში ძაღლი მავთულით ჩამოჰკიდეს და ყბის ძვლები ხელკეტით ჩაუმსხვრიეს – დაწყებულია გამოძიება

3 ივნისს დუშეთის მუნიციპალიტეტის სოფელ ჭოპორტში ჰასკის ჯიშის ძაღლი აწამეს. ინფორმაცია თამაზ ელიზბარაშვილის ძაღლთა თავშესაფარმა გაავრცელა.

  • საქართველოს შინაგან საქმეთა სამინისტრომ სოციალურ ქსელში გავრცელებული ინფორმაცია დღეს დილით მოიკვლია და გამოძიება 259-ე მუხლის პირველი ნაწილით დაიწყო, რაც ცხოველის წამებას ან მისდამი სასტიკ მოპყრობას გულისხმობს, რამაც მისი დაღუპვა ან დასახიჩრება გამოიწვია.

თამაზ ელიზბარაშვილის ძაღლთა თავშესაფარი აცხადებს, რომ კონფიდენციალურად მიაწოდეს ინფორმაცია სავარაუდო ორი მოძალადის შესახებაც. ელიზბარაშვილის წყაროს ინფორმაციით, ჰასკი მავთულით ჩამოჰკიდეს და ყბის ძვლები ხელკეტით ჩაუმსხვრიეს.

მთელმა საქართველომ უნდა იცოდეს მოძალადეების ვინაობა, რადგან შსს-ს იმედი ნაკლებად გვაქვს, რომ დასჯის დამნაშავეებს… მიუხედავად იმისა, რომ კანონი ასეთ დანაშაულზე სულ ახლახას გაამკაცრეს”, – აცხადებს თამაზ ელიზბარაშვილი.

ნაწამები ჰასკი ელიზბარაშვილის ძაღლთა თავშესაფარში წუხელ ერთ-ერთმა მოქალაქემ მიიყვანა. ცხოველი დილით უკვე ჰყავდათ ვეტ-კლინიკა აიბოში, სადაც დადგინდა, რომ ძაღლს ყბის ძვლები სულ დალეწილი აქვს.

თამაზ ელიზბარაშვილის ძაღლთა თავშესაფრის განცხადებით, ნაწამები ჰასკი ჭამას ვერასოდეს შეძლებს და თუ სასწაული არ მოხდა, მისი დაძინება მოუწევთ.

ნეტგაზეთის მასალების სხვა გამოცემებში გადაბეჭდვის წესი
ავტორი
გიორგი დიასამიძე არის ნეტგაზეთის რეპორტიორი 2014 წლიდან. აშუქებს საზოგადოებრივ-პოლიტიკურ თემებს, სპორტს და სხვა მიმდინარე მოვლენებს. ასევე, მუშაობს განათლების, ადამიანის უფლებებისა და სოციალურ საკითხებზე.