ორგანიზატორები უარყოფენ, რომ ყაჩაღობაში ბრალდებულს კავშირი აქვს ანტისაოკუპაციო აქციასთან

პოლიციამ “112”-დან შესული შეტყობინების საფუძველზე 1987 წელს დაბადებული ნოდარ რაფავა დააკავა, რომელსაც თბილისში, Iplus-ის მაღაზიაში შეჭრას, მძევლის აყვანასა და ნივთების დაზიანებას ედავებიან. მედიის ნაწილი მას დედაქალაქის ცენტრში მიმდინარე აქციებთან აკავშირებს და იუწყება, რომ დაკავებული დემონსტრაციაზე სიტყვით გამოვიდა და სხვების მსგავსად შს მინისტრ გიორგი გახარიას გადაყენება მოითხოვა. აქციის ორგანიზატორები უარყოფენ რაიმე კავშირს რაფავასთან.

გამოძიების ცნობით, რაფავა პეკინის გამზირზე მდებარე ტექნიკის მაღაზია “iplus”-ში დღეს, 26 ივნისს შეიჭრა, რის შემდეგაც გამყიდველს ძალადობისა და დანის გამოყენებით სიცოცხლის მოსპობის მუქარით ფული და ტელეფონი მოსთხოვა. ბრალდებულმა დააზიანა მაღაზიის ინვენტარი და გასაყიდი საქონელი. ის ადგილზევე დააკავეს. გამოძიება მძევლად ხელში ჩაგდების და სხვისი ნივთის განზრახ დაზიანების მუხლებით მიმდინარეობს, რაც 7-დან 10 წლამდე პატიმრობას ითვალისწინებს.

აღნიშნულის შემდეგ მედიასაშუალებების ნაწილმა, მათ შორის, ტელეკომპანია “იმედმა” და “POSTV”-მ, ბრალდებულის დაკავების ვიდეო გაავრცელეს და ხაზი გაუსვეს, რომ ნოდარ რაფავამ პარლამენტთან მიმდინარე აქციის მონაწილეებს სიტყვით მიმართა.

” „აიპლიუსის” მაღაზიის დაყაჩაღების მცდელობისას ნოდარ რაფავა დააკავეს – ბრალდებული 21 ივნისს, პარლამენტთან აქციაზე გიორგი გახარიას გადადგომას ითხოვდა”, – ასე დაასათაურა რეპორტაჟი “POSTV”-მ.

აღნიშნულთან დაკავშირებით “ნეტგაზეთი” პროტესტის ერთ-ერთ ორგანიზატორს, ლექსო მაჭავარიანს ესაუბრა. მისი თქმით, რაფავა აქციაზე მართლაც გამოვიდა სიტყვით, თუმცა ეს მაშინ მოხდა, როცა სცენა და მიკროფონის ხელმისაწვდომობის საკითხი შესაბამისად მოწესრიგებული არ იყო. მისივე თქმით, შემდგომ, 23 ივნისს, როცა სცენას უკვე იცავდა ბარიკადები და დაცვა, ნოდარ რაფავა ადგილზე კვლავ გამოჩნდა და თხოვნის მიუხედავად, უარს აცხადებდა სცენის შიდა ტერიტორიის დატოვებაზე. მაჭავარიანის ცნობით, აქციის ორგანიზატორებმა პოლიციას მიმართეს და სამართალდამცავებს ჩააბარეს ის.

“აქციის პირველ დღეებში, როცა სრული უკონტროლობა იყო მიკროფონთან და არც ჯებირები, არც დაცვა იდგა, ძალიან ბევრი ადამიანი ადიოდა სცენაზე და უამრავ რამეს იძახდა. ერთ-ერთი იყო ეს პიროვნება, რომელიც მიკროფონთან მოხვდა და, როგორც ბევრმა სხვა ადამიანმა, საკუთარი აზრი გამოხატა. საკმაოდ პოზიციური აზრი, როგორც მახსოვს, აქციის მიზნებთან თანხვედრაში მყოფი.

მეორე დღეს, როცა უკვე გავწიეთ დაცვის ღონისძიებები, ჯებირები მოვიტანეთ და დავიწყეთ პროვოკატორებისგან და მსგავსი სუბიექტებისგან ტერიტორიის დაცლა, ეს პიროვნება[რაფავა] იქ [ისევ] შევნიშნეთ. საკმაოდ აღელვებული იყო და სცენის შიდა ტერიტორიის დატოვებაზე სასტიკ უარს აცხადებდა. დაცვის თანამშრომლებთან წაკინკლავებაც მოუვიდა.

ამის შემდეგ მე და რამდენიმე ორგანიზატორი მივედით პოლიციასთან, რომლებიც გამზირზე მორიგეობენ. მივმართე პოლიციელ ლადო სადღობელაშვილს, რომელიც მეტნაკლებად  ხელმძღვანელ თანამდებობას იკავებს. ვთხოვე, მოსულიყო და დაგვხმარებოდა ამ პირის იქიდან გაყვანაში. კამერიან პოლიციელებს დაელოდნენ, მათი მოსვლის შემდეგ კი გაიყვანეს ეს პიროვნება. ის, რომ აქციის ორგანიზატორებმა ეს პიროვნება პოლიციას ჩააბარეს, არის გადაღებული. ასე რომ, ამ მხრივ რაც უნდა ეცადონ შალვა რამიშვილი და მისი POSTV, ჩირქი მოგვცხონ, არ გამოუვათ”, – უთხრა მაჭავარიანმა “ნეტგაზეთს”.

ფეისბუქის ერთ-ერთი მომხმარებელი ვიდეოსაც ავრცელებს, რომელშიც ჩანს, როგორ გაჰყავს პოლიციას ნოდარ რაფავა სცენის ტერიტორიიდან ორგანიზატორთა თხოვნის შემდეგ.

ნეტგაზეთის მასალების სხვა გამოცემებში გადაბეჭდვის წესი
ავტორი
მიხეილ გვაძაბია არის ნეტგაზეთის რეპორტიორი 2017 წლის სექტემბრიდან