ფინანსთა სამინისტროს საგამოძიებო სამსახურის ინფორმაციით, ყალბი აქციზური მარკების დიდი ოდენობით დამზადება-გასაღების ბრალდებით ერთი ადამიანი დააკავეს.
უწყების ცნობითვე, საქმეზე გამოძიება სისხლის სამართლის კოდექსის მე-200 პრიმა მუხლის მეორე ნაწილით მიმდინარეობს, რაც თავისუფლების აღკვეთას 4-დან 6 წლამდე ვადით ითვალისწინებს.
“გამოძიებით დადგინდა, რომ ბრალდებულმა, არაკანონიერი მატერიალური სარგებლის მიღების მიზნით, დაამზადა და გაასაღა სიგარეტის ნაწარმის მარკირებისათვის განკუთვნილი დიდი ოდენობით ყალბი აქციზური მარკა. საგამოძიებო მოქმედებების შედეგად ამოღებულია 1 545 ცალი ყალბი აქციზური მარკა, აქციზური მარკების საბეჭდი კომპიუტერული ტექნიკა და შესაბამისი ტექნიკური დანადგარი,”-წერია განცხადებაში.
