ევროპის დღისათვის თბილისში მდებარე რიყის პარკი “ევროსოფლად” გადაიქცა. 5 მაისს, მთელი დღის მანძილზე, ადგილზე საინფრომაციო და გასართობი ღონისძიებები ეწყობოდა.
ევროპის დღის აღნიშვნაში მონაწილეობა ევროკავშირის წევრმა სახელმწიფოებმა მიიღეს. წარმოდგენილი იყო ევროკავშირის არაერთი პროგრამაც, რომლებში მონაწილეობაც საქართველოს მოქალაქეებს შეუძლიათ. მუსიკალურ ნომრებთან, თამაშებთან და თეატრალურ წარმოდგენებთან ერთად, პარკის ტერიტორიაზე განთავსებულ სტენდებზე ღონისძიების სტუმრებს ევროგაერთიანების წევრი ქვეყნების ტრადიციული კერძებიც ელოდათ.
რიყის პარკში ევროკავშირის ელჩი საქართველოში, ასევე ქვეყნის პრეზიდენტი და პრემიერ–მინისტრი იმყოფებოდნენ, რომელთაც ღონისძიების სტუმრებს სიტყვით მიმართეს.
5 მაისი ევროპის დღედ 1964 წელს გამოცხადდა, ვინაიდან სწორედ ამ დღეს, 1949 წლის 5 მაისს დაარსდა ევროპის საბჭო.