ნეტგაზეთი | სოხუმი რუსეთთან სამხედრო შეთანხმების საკითხს კავკასიაში NATO-ს პოლიტიკით ხსნის სოხუმი რუსეთთან სამხედრო შეთანხმების საკითხს კავკასიაში NATO-ს პოლიტიკით ხსნის – Netgazeti
RU | GE  

სოხუმი რუსეთთან სამხედრო შეთანხმების საკითხს კავკასიაში NATO-ს პოლიტიკით ხსნის

აფხაზეთის საგარეო საქმეთა უწყების განცხადებაში ნათქვამია, რომ აფხაზეთში ახალ სამხედრო კავშირს რუსეთთან განიხილავენ როგორც უსაფრთხოების ერთადერთ რეალურ გარანტიას იმ ახალი საფრთხეების ჭრილში, რომელსაც კავკასიის რეგიონში NATO ქმნის.

ინფორმაციას გამოცემა აპსნიპრესი ავრცელებს. 

 

ამ განცხადებით აფხაზეთის საგარეო საქმეთა სამინისტრო აშშ-ის თავდაცვის მდივნის, ჩაკ ჰეიგელის 7 სექტემბრის განცხადებას გამოეხმაურა.


“აშშ-ის მაღალჩინოსნის განცხადება ისევ იმას მოწმობს, რომ ეს ქვეყანა საკუთარ თავს “მსოფლიო ჟანდარმად” მიიჩნევს, რომელიც ნებისმიერი საშუალებებით დიქტატის პოლიტიკას ატარებს. ვაშინგტონში დაჟინებით აგრძელებენ არ შეიმჩნიონ ის ფაქტი, რომ მსოფლიო განვითარების ახალ პოლიცენტრულ პერიოდში შევიდა, რომელშიც სულ უფრო მცირე ადგილი რჩება ცალმხრივ ჰეგემონიას და ამერიკული “თამაშის წესების” იძულებას,”- წერია განცხადებაში. 


თბილისში 7 სექტემბერს გამართულ პრესკონფერენციაზე აშშ-ის თავდაცვის მდივანმა, ჩაკ ჰეიგელმა რუსეთს მოუწოდა “საქართველოს საზღვრიდან გაიყვანოს თავისი ჯარი.” 


“რუსეთის მიერ აღმოსავლეთ უკრაინაში განხორციელებული სამხედრო აგრესია საფრთხეს უქმნის რეგიონის სტაბილურობას. რამდენიმე წლის წინ რუსეთმა ასევე დაარღვია საქართველოს საერთაშორისოდ აღიარებული საზღვრები. თუმცა, უნდა ითქვას, რომ რუსეთის უკანონო ქმედებებმა შეერთებულ შტატები და ევროპის ქვეყნები, მათ შორის საქართველო კიდევ უფრო დააახლოვა ერთმანეთს. შერთებული შტატები კვლავ მოუწოდებს რუსეთს, გაიყვანოს ჯარები საქართველოს ოკუპირებული რეგიონებიდან”,- განაცხადა ჩაკ ჰეიგელმა თბილისში ვიზიტის დროს. 

ნეტგაზეთის მასალების სხვა გამოცემებში გადაბეჭდვის წესი
ნეტგაზეთი , ------------------------------------------------------------ , -------------------------------------------------------------- , მასალაში გამოყენებულია თვითაღიარებულ რესპუბლიკაში დამკვიდრებული ტერმინოლოგია