საქართველოს პარლამენტის თავმჯდომარე ირაკლი კობახიძე “კოალიცია მართლმსაჯულებისთვის” წარმომადგენელს, გიორგი მშვენიერაძესა და ჯგუფში შემავალ არასამთავრობოებს აკრიტიკებს. კობახიძე “პოლიტიკურ სპექტაკლს” უწოდებს მშვენიერაძის გადაწყვეტილებას იმ სამუშაო ჯგუფის დატოვებასთან დაკავშირებით, რომელიც სასამართლოში მოსამართლეთა უვადოდ განწესების კრიტერიუმებს განიხილავს.
კობახიძის თქმით, მშვენიერაძესა და კოალიციის სხვა წევრებს “კონკრეტული პოლოტიკური ინტერესი” ამოძრავებთ.
“კოალიცია მართლმსაჯულებისთვის” ტოვებს საქართველოს პარლამენტის თავმჯდომარის მიერ შეთავაზებულ სამუშაო ფორმატს, რომლის ფარგლებშიც უზენაეს სასამართლოში მოსამართლეთა განწესების კრიტერიუმების შემუშავებაზე მსჯელობენ.
როგორც “ნეტგაზეთს” კოალიციის წარმომადგენელმა, გიორგი მშვენიერაძემ უთხრა, სამუშაო ჯგუფის ფორმატში გამართული ორი შეხვედრიდან გამოჩნდა, რომ ირაკლი კობახიძის მიერ წარმოდგენილი კანონპროექტი სასამართლო სისტემაში შექმნილ გამოწვევებს ვერ პასუხობს და მეტიც, ის ემსახურება სისტემაში არსებული გავლენის ჯგუფის მიერ მიღებული გადაწყვეტილებების შეფუთვას.
