პოლიტიკური პარტია “გირჩი” იუწყება, რომ ახალი წლის ღამეს პარტიის ლიდერის, ზურაბ ჯაფარიძის გაქირავება გადაწყვიტეს.
პრესსამსახურის ცნობით, პარტიის დაფინანსების მიზნით “გირჩი” აუქციონს აწყობს, რომლის გამარჯვებულებს — ანუ სამ ყველაზე მსხვილ შემომწირველს — 31 დეკემბრის ღამეს ზურა ჯაფარიძე მეკვლედ ეწვევა.
აუქციონი (#ჯაფარამეკვლედ) ორ ნაწილად იყოფა:
- პირველი აუქციონი ტარდება 2018 წლის 24 დეკემბრიდან 31 დეკემბრის 23:30 საათამდე. 23:45 საათზე სამი გამარჯვებული გამოვლინდება.
პირველ გამარჯვებულთან ჯაფარიძე 01:00-დან 02:00 საათამდე შუალედში მივა, მეორესთან- 2-დან 3 საათამდე, მესამესთან კი- 3-დან 4 საათამდე. პარტიის ვებგვერდის თანახმად, შემომწირველთა აუქციონის ფარგლებში ჯაფარიძის სტუმრად მისვლა შესაძლებელია მხოლოდ თბილისის ფარგლებში. გირჩი იქვე მიუთითებს, რომ “გამონაკლისია ბიძინა ივანიშვილთან სტუმრობის შემთხვევაში”. - ახალი წლის ღამის აუქციონი ჩატარდება პირველი იანვრის 00:00 საათიდან 03:00 საათამდე. 03:15 საათზე ორი გამარჯვებული გამოვლინდება.
პირველთან ჯაფარიძე, საიტის თანახმად, 04:00-დან 05:00 საათამდე შუალედში მივა, მეორესთან კი- 5-დან 6 საათამდე.
გირჩის ვებსაიტზე ჩანს, რომ საწყისი ბიდი 1 თეთრი იყო, შემდეგი — 4 თეთრი, ამ დროისთვის [24 დეკემბერი, 22:30 საათი] აუქციონის მონაწილეების მიერ შეთავაზებული ყველაზე მაღალი თანხა ჯერჯერობით 35 ლარია.