როგორც ადგილობრივები ამბობენ, გოგონა უგონო მდგომარეობაში ერთ-ერთ სადარბაზოსთან იპოვეს. მათი ინფორმაციით, მოზარდს ყელზე თოკი ჰქონდა შემოხვეული.

“ტკვილები რომ აწუხებს ადამიანს, ისეთ მდგომარეობაში იწვა, მოძრაობდა, მაგრამ ხმას ვერ გამოსცემდა. ერთადერთი კვნესის ხმა იყო,”- ამბობს თვითმხილველი.

შინაგან საქმეთა სამინისტროში აცხადებენ, რომ საქმის ძიება სისხლის სამართლის კოდექსის 115-ე მუხლით [თვითმკვლელობამდე მიყვანა] დაიწყო.

“იმის გამო, რომ გოგონა მძიმე მდგომარეობაშია, მისი დაკითხვა ვერ მოხერხდა,”- განუცხადეს ნეტგაზეთს შსს-ს პრესსამსახურში.

სამართალდამცავთა ვერსიაში ეჭვი შეაქვთ მოზარდის ახლობლებს და ოჯახის წევრებს.

“მიყავთ სხვა კუთხით, რომ ეს არის თვითმკვლელობა, მაგრამ ბავშვი არის გადმოგდებული,”- განაცხადა გოგონას დედამ ტელეკომპანია რუსთავი 2-თან საუბარში.

ექიმ მაია ფეიქრიშვილის თქმით, პაციენტის მდგომარეობა ამჟამად მძიმეა, თუმცა მისი გადარჩენის შანსი არსებობს.