NDI-ის დაკვეთით ჩატარებული კვლევის მიხედვით, გამოკითხულთა უმრავლესობას უფრო მეტად იწონებს საქართველოს პრემიერმინისტრ ირაკლი ღარიბაშვილის მუშაობას ჯანდაცვის მიმართულებით (24%). გამოკითხულთა 17%-ს მიაჩნია, რომ პრემიერი ადამიანის უფლებების დაცვის კუთხით კარგად მუშაობს.
გამოკითხულები ყველაზე უკმაყოფილონი არიან სოციალური საკითხების მოგვარებით. გამოკითხულთა 42% მიიჩნევს, რომ სამუშაო ადგილების შექმნის კუთხით მთავრობა ქმედით ნაბიჯებს არ დგამს. გამოკითხულთა 45%- ინფლაციის წინააღმდეგ, ხოლო 44%- სიღარიბის წინააღმდეგ მთავრობის მუშაობით უკმაყოფილოა.
გამოკითხულთა მნიშვნელოვან ნაწილს მიაჩნია, რომ გადასახადების, პენსიებისა და ტერიტორიული მთლიანობის აღდგენის კუთხით ღარიბაშვილმა მუშაობა უნდა გააუმჯობესოს.
შემდეგ შეკითხვაზე, თუ რომელი პოლიტიკური პარტია შეძლებს სოფლის მეურნეობის, სამედიცინო მომსახურების, გაზმომარაგების, ციხეებში არსებული პრობლემების, განათლების, პენსიების, უმცირესობათა უფლებების, გზების, სიღარიბისა და სამუშაო ადგილების, ტერიტორიული მთლიანობის, ნატოში გაწევრიანების, კრიმინოგენული საკითხის მოგვარებას, გამოკითხულთა ნახევარზე მეტს “ქართული ოცნების” იმედი აქვს.
