ბიძინა ივანიშვილმა გუშინდელი ინტერვიუს დიდი ნაწილი “რუსთავი 2”-ზე საუბარს დაუთმო.

პარტია “ქართული ოცნების” თავმჯდომარე საზოგადოებას პირობას აძლევს, რომ მაქსიმალურად ერთ წელიწადში, გაძლიერებული მენეჯმენტით, მოახერხებს, “ყველაფერს თავისი სახელი დაერქვას ამ სახელმწიფოში, მათ შორის, “რუსთავი 2″-ის როლსაც”.

ბიძინა ივანიშვილის მტკიცებით, მისი ნათქვამი არ უნდა იქნას გაგებული როგორც მუქარა ტელევიზიისადმი. ექსპრემიერის თქმით, მან იგულისხმა მონიტორინგის ჩატარება სიცრუის ტირაჟირების შესახებ:

“ღმერთმა დამიფაროს “რუსთავი 2”-ში შესვლისგან. ჩავატარებთ რეიტინგს და ვაჩვენებთ, რომ “რუსთავი 2″-ში განსხვავებული აზრი არ შედის და თუ ისინი ამას არ გაითვალისწინებენ, საზოგადოება გაიგებს, რომ ეს არის სიცრუის ტელევიზია”, – დასძინა ივანიშვილმა.