ახალი ამბები

მეტროს გაფიცული თანამშრომლები კალაძეს ისევ ხვდებიან

6 ივნისი, 2018 • 2474
მეტროს გაფიცული თანამშრომლები კალაძეს ისევ ხვდებიან

თბილისის მეტროპოლიტენის გაფიცული მემანქანეები თბილისის მერს, კახა კალაძეს უკვე მეორედ ხვდებიან. როგორც “ნეტგაზეთს” მერიის პრესსამსახურში განუცხადეს, შეხვდრა ამჟამად მერიის შენობაში მიმდინარეობს.

შეხვედრა “ერთობა 2013”-ის წევრთა ნაწილსა და მერს შორის ცოტა ხნის წინ დაიწყო. ჯერჯერობით უცნობია საკითხები და შეთავაზებები, რომელთაც შეხვედრაზე განიხილავენ.

მემანქანეთა მოთხოვნა მათი ხელფასის გადახედვისა და 45%-ით ზრდის შესახებ უცვლელია. როგორც 5 ივნისს პროფკავშრული გაერთიანების თავმჯდომარის მოადგილე აჩიკო ლაბაძემ “ნეტგაზეთს” განუცხადა, მემანქანეები მზად არიან, გაფიცვა შეწყვიტონ, თუ მერია დოკუმენტურად დაადასტურებს, რომ ხელფასის 45%-ით ზრდა 2019 წლის 1 იანვრიდან დაიწყება.

“45%-იანი მატება შეგვიძლია განვიხილოთ დროში გაწელილად. მათ შორის, 2019 წლის იანვრიდან მატების პერსპექტივიდ. თუ 2019 წლიდან მოხდება 45%-იანი მატება, მაშინ მისაღები იქნება.

სხვა ვარიანტიც არის: [მაგალითად]ხვალიდან რომ მოემატოს 20% და იანვრიდან- დანარჩენი 25%, ასეთი შემთხვევაც შესაძლებელია. თუმცა, ჯამში, კომბინაცია უნდა იყოს 45%”, – აღნიშნა მან.

მსგავსი შეთავაზება მემანქანეებისათვის მერიასა და თბილისის სატრანსპორტო კომპანიას ჯერჯერობით არ გაუხმიანებიათ.

მეტროპოლიტენის გაფიცული თანამშრომლები მერს გუშინ, 5 ივნისს,  უკვე შეხვდნენ. თუმცა დეპო “გლდანის” შენობაში მიმდინარე შეხვედრა მემანქანეებმა პროტესტის ნიშნად დატოვეს და აღნიშნეს, რომ კალაძისგან კონკრეტული დაპირებები არ მოუსმენიათ.

მასალების გადაბეჭდვის წესი