გეი აქტივისტი ნიკა გორგილაძე, რომელსაც მთავრობის კანცელარიასთან 17 მაისს მიმდინარე ანტიჰომოფობიურ აქციაზე თავს არასრულწლოვანი დაესხა, ამბობს, რომ დამნაშავეა სისტემა და მას აგრესია არ აქვს თავდამსხმელის მიმართ.

“ამწამს გამოვედი დაკითხვიდან, მივდივარ სახლში. უკეთ ვარ. დიდი მადლობა ყველას, ვინც გვერდში მედგა, მწერდა, მირეკავდა. ერთი წამით არ ვნანობ აქციაზე დგომას. მშვიდ მონობას ასეთი თავისუფლება მირჩევნია.
უკანასკნელ აღმოხდომამდე ვიტყვი, რომ სიყვარული სიყვარულია! არანაირი აგრესია არ მაქვს მოძალადე არასრულწლოვნისადმი, დამნაშავეა სისტემა, სკოლა, ეკლესია, ოჯახი, სახელმწიფო. ვისურვებდი, მე და ამ ბიჭს უკეთეს საზოგადოებაში გვეცხოვროს.

ბოდიში ჩემს ოჯახს”, – წერს ნიკა გორგილაძე პირად ფეისბუკ გვერდზე.

ნიკა გორგილაძეს არასრულწლოვანი ბიჭი თავს სიტყვით გამოსვლისას დაესხა. პოლიციამ ის მალევე დააკავა. შინაგან საქმეთა სამინისტროს ცნობით, თავდამსხმელი 15 წლის არის.

“ს.კ-მ შემთხვევის ადგილიდან მიმალვა სცადა, რა დროსაც იგი სამართალდამცველებმა დააკავეს. გამოძიება დაიწყო საქართველოს სისხლის სამართლის კოდექსის 126-მუხლის 1-ნაწილით, რაც ძალადობას გულისხმობს”, – ნათქვამია შსს–ს განცხადებაში.

17 მაისი ჰომოფობიასთან და ტრანსფობიასთან ბრძოლის საერთაშორისო დღეა. თუმცა, 2014 წლიდან საპატრიარქომ ეს დღე ოჯახის სიწმინდის დღედ გამოაცხადა.