საქართველოს შინაგან საქმეთა სამინისტროს ინფორმაციით, 12 აპრილს, თბილისში „ჰაშიშის“ საქართველოში უკანონოდ შემოტანის ბრალდებით 1 პირი დააკავეს.
უწყების ცნობით, ბრალდებული პოლიციამ თბილისში DHL-ის ოფისის მიმდებარე ტერიტორიაზე დააკავა და მისი პირადი ჩხრეკისას, ამანათის სახით მიღებული, პირველადი ინფორმაციით, 9 კილოგრამი „ჰაშიში“ ამოიღო.
ამოღებულ ნივთიერებაზე, უწყების განცხადებით, ექსპერტიზაა დანიშნული. შსს-ში ამბობენ, რომ აღნიშნული ამანათი ნეპალიდან გერმანიის გავლით არის გამოგზავნილი.
გამოძიება განსაკუთრებით დიდი ოდენობით ნარკოტიკული საშუალების საქართველოში უკანონოდ შემოტანის ფაქტზე, საქართველოს სსკ-ს 262-ე მუხლით მიმდინარეობს.