“ჩვენ ვთქვით, რომ გვჯერა ასეთი კადრების არსებობის, ვთქვით, რომ ვენდობით გამოძებას, მაგრამ გვაინტერესებდა გამოძიების შესახებ ინფორმაცია, გვაინტერესებდა, რა მიზანს ემსახურება ამ კადრების ჩვენება, როდესაც საზოგადოებას სჯერა, რომ ეს კადრები არსებობს.

არანაირი განმარტება არ გაკეთებულა. მათ განმარტეს, რომ ვისაც სუსტი ნერვები აქვს, დატოვოს შეხვედრაო. აქ არ არის საუბარი არც გამძლეობაზე და არც ნერვებზე, ეს არის ჩვენი სოლიდარობა იმ მსხვერპლი ადამიანების მიმართ. მათ ახლა სხვანაირი დახმარება სჭირდებათ”, – განაცხადა მან.

ახალგაზრდა იურისტთა ასოციციის ხელმძღვანელმა კახა კოჟორიძემ შეხვედრის დაწყებისას განაცხადა, რომ შემდგარიყო დიკუსია და მსჯელობა საქმის გამოძიების შესახებ, თუმცა, მისი თქმით, შეხვედრის მონაწილეთა უმეტესობამ მოითხოვა, რომ ვიდეომასალა ეჩვენებინათ.

შეხვედრის დასაწყისში კონფლიქტი მოხდა “საზოგადოებრივი მაუწყებლის” გადაცემა “აქცენტების” წამყვან ეკა კვესიტაძესა და იქ შეკრებილ სხვა რამდენიმე პირთან, მათ შორის ირაკლი კაკაბაძესთან, რის გამო კვესიტაძემ სამინისტრო დატოვა. კვესიტაძემ დღევანდელ შეხვედრას “ცირკი” უწოდა და განაცხადა, რომ აქვს შეკითხვები შს მინისტრთან, რომელსაც იწვევს მის გადაცემაში, პირდაპირ ეთერში.

“საზოგადოებრივი მაუწყებლის” გადაცემა “დიალოგის” წამყვანმა დავით პაიჭაძემ ირაკლი ღარიბაშვილისგან მოითხოვა დეტალური განმარტება, იყო თუ არა კადრები სათანადოდ დაფარული, რაზეც ცალსახა პასუხი მინისტრმა ვერ გასცა. პაიჭაძის თქმით, მას ჰქონდა მინისტრთან შეკითხვები, რაზეც ღარიბაშვილმა უპასუხა, რომ კარგი იქნებოდა, თუკი ის აქამდეც, ამ 9 წლის განმავლობაში დაინტერესდებოდა ადამიანის უფლებებით:

“სტატისტიკაზე არ დამიწყია საუბარი, უბრალოდ, ვუთხარი, რომ მინისტრი აზრზე არ არის, რას ვაკეთებდი”, – აცხადებს პაიჭაძე, რომელმაც პროტესტის ნიშნად დატოვა სამინისტრო.

ვიდეომასალის ჩვენებამდე დატოვეს სამინისტრო არასამთავრობო ორგანიზაციების წარმომადგენლებმა – კახა კოჟორიძემ (საია), ნინო ლომჯარიამ (სამართლიანი არჩევნები), ეკა გიგაურმა (საერთაშორისო გამჭვირვალობა საქართველო). ასევე, შეხვედრა დატოვეს “24 საათის” რედაქტორებმა პაატა ვეშაპიძემ და მამუკა ფაჩუაშვილმა.

რამდენიმე წუთის წინ შსს-ში დაიწყო ვიდეომასალის ჩვენება, სადაც, როგორც “ნეტგაზეთის” რედაქტორი იტყობინება, პირველივე კადრით იყო შესაძლებელი მსხვერპლის სრულად იდენტიფიცირება, რის გამოც მანაც დატოვა პროტესტის ნიშნად სამინისტრო. ასევე, დატოვა შეხვედრა “რეგიონულ მაუწყებელთა ასოციაციის” ხელმძღვანელმა ნათია კუპრაშვილმა. თუმცა ჟურნალისტების ნაწილი ვიდეომასალის ნახვას აგრძელებს.

შეგახსენებთ, რომ შსს-ს ცნობით, სამეგრელოს სამალავში მათ აღმოაჩინეს იარაღი, ნარკოტიკები და ვიდეომასალები, სადაც ადამიანების წამებაა ასახული. ღარიბაშვილის თქმით, განსაკუთრებით სასტიკია ორი პირის წამების ამსახველი ვიდეომასალა, სადაც აღბეჭდილია მათი გაუპატიურების სცენები. ეს ვიდეომასალები გუშინ შსს-ში დიპლომატიური კორპუსის წარმომადგენლებს აჩვენებს, დღეს კი სამინისტრომ ჩვენება მოაწყო მედიაორგანიზაციების ხელმძღვანელებისა და არასამთავრობო ორგანიზაციების წარმომადგენლებისთვის.